Турэччына бамбуе сірыйскі горад Афрына і абвясціла аб наземнай аперацыі. Расея заявіла, што не будзе ўмешвацца

Турэцкія ваенна-паветраныя сілы нанеслі авіяўдары па пазіцыях курдаў у Афрыне на поўначы Сірыі. Гэты крок можа прывесці да росту напружанасці ў адносінах Турэччыны і ЗША, якія падтрымлівалі курдскае апалчэнне ў барацьбе супраць «Ісламскай дзяржавы».

Генштаб Турэччыны абвясціў, што аперацыя «Аліўкавая галіна» пачалася ў суботу 17:00 па менскім часе. Яна будзе праведзена «з павагай да тэрытарыяльнай цэласнасці Сірыі», гаворыцца ў заяве вайскоўцаў. Турэцкія ўлады спрабуюць выціснуць курдаў з рэгіёну Афрын, які тыя займаюць з 2012 года.

https://twitter.com/RealNewsLine/status/954738342750507009?ref_src=twsrc%5Etfw&ref_url=https%3A%2F%2Fwww.svaboda.org%2Fa%2F28986889.html

Прэзідэнт Рэджэп Таіп Эрдаган раней у суботу заявіў, што турэцкае войска фактычна пачало наземную баявую аперацыю супраць курдаў. Выступаючы на ​​канферэнцыі кіруючай партыі, Эрдаган сказаў, што пасля Афрына вайскоўцы распачнуць аперацыю ў Манбідже ў Сірыі.

Сірыйскія ўлады, у сваю чаргу, перасцераглі Турэччыну ад любой ваеннай кампаніі і прыгразілі збіваць турэцкія самалёты.

Аналітыкі лічаць, што абвастрэнне сітуацыі ў рэгіёне можа прывесці да прамога канфлікту з саюзнікам Турэччыны па NATO – ЗША, падтрымкай якіх карыстаецца курдскае апалчэнне. Нягледзячы на ​​тое, што Турэччына ўваходзіць у кааліцыю на чале з ЗША, якая змагаецца з «ІД» у Сірыі, Анкара заўсёды выступала супраць удзелу ў ёй курдаў і спрабавала перадухіліць захоп курдамі памежных з Турэччынай раёнаў Сірыі.

Расея, якая падтрымлівае рэжым Башара Асада ў Дамаску, заявіла, што не будзе ўмешвацца ў канфлікт у Афрыне.

ІІ, belsat.eu, паводле Бі-бі-сі