Наталля Жызнеўская працуе на гомельскім мясакамбінаце. Жанчыне не патлумачылі прычынаў, чаму не хочуць працягваць кантракт, паведамляе БелаПАН.
Наталля прапрацавала на мясакамбінаце больш за пяць гадоў, на апошняй пасадзе – рабочай у каўбасным цэху – яна працавала каля двух гадоў. Кантакт заканчваецца 12 чэрвеня. Паводле Жызнеўскай, да яе ніколі не было прэтэнзіяў і заўваг па працы.
«У цэху ўсе ведалі, што мой брат загінуў на Майдане, казалі мне ў твар, што я сястра бандыта. А асабліва пачалі зайздросціць, калі прачыталі ў інтэрнэце, што бацькі будуць атрымліваць пажыццёвую стыпендыю за смерць Мішы. Мне не давалі праходу, асабліва кіраўніцтва, дакаралі і за Мішу, і за стыпендыю бацькам. Цяпер пакідаюць мяне без сродкаў да існавання», – адзначыла Жызнеўскі.
Начальнік аддзелу кадраў мясакамбіната Алена Бліннікава запэўніла БелаПАН, што ў рашэнні не працягваць кантракт Жызнеўскай «няма ніякай палітыкі», а звязана яно з прэтэнзіямі кіраўніцтва каўбаснага цэха да якасці ейнай працы.
«Перш чым не працягнуць кантракт, наймальнік пытаецца непасрэднага кіраўніка, а ў начальніка цэха ёсць заўвагі да яе па працы. Да таго ж наймальнік не абавязаны тлумачыць, чаму не працягвае кантракт. У нас паўтары тысячы чалавек, і з кантрактамі праца ідзе штодня, камусьці падаўжаюць, камусьці не – звычайны працэс. Я нават сумняюся, што дырэктар ведае яе ў твар, – абсалютна ніякага прадузятага стаўлення няма. А пра яе брата я наагул першы раз чую. З нагоды гібелі ейнага брата, можа, і былі чуткі на прадпрыемстве, але нідзе гэта не афішавалася. Калі нават спытаць у цэху, дзе яна працуе, можа, ніхто і не ведае, што ў яе там брат загінуў. Гэта не палітыка сто адсоткаў. Гэта проста рабочы чалавек, які павінен прыйсці а 8 гадзіне і, не адцягваючыся, рабіць сваю працу», – патлумачыла Бліннікава.
Наталля Жызнеўская мае намер аспрэчыць сваё звальненне.
25-гадовы беларус Міхаіл Жызнеўскі загінуў 22 студзеня 2014 года ў выніку сутыкненняў з праваахоўнікамі на вуліцы Грушэўскага ў Кіеве. Яго забілі стрэлам у сэрца. Герой Нябеснай сотні пахаваны 28 студзеня на могілках у вёсцы Сцяг Працы (Абрэзы), што на Гомельшчыне.
ДР, belsat.eu