Святлана Алексіевіч: «Нам патрэбная дапамога ў супрацьстаянні». Лісты падтрымання «Белсату».


Лаўрэатка Нобэлеўскай прэміі, першы кіраўнік незалежнай Беларусі, экс-палітвязні – беларуская інтэлігенцыя піша лісты з просьбаю падтрымаць тэлеканал «Белсат».

aleksijevic

Святлана Алексіевіч, пісьменніца, лаўрэатка Нобэлеўскай прэміі, мяркуе, што ліквідацыя «Белсату» і стыпендыяльнай Праграмы Каліноўскага для рэпрэсаваных студэнтаў азначае «знішчэнне і дэмаралізацыю беларускай апазіцыі».

«Сваймі ўнутранымі сіламі мы не дамо рады. Татальнае зачышчэнне, якое ўлады праводзяць сістэматычна, і страх, які пасяліўся ў кожным, замінаюць нам рабіць гэтую працу тут. У хаце. Мы скаваныя. Нам патрэбная дапамога. Калі мы пазбавімся падтрымання цяпер, у будучыні давядзецца пачынаць спачатку. Пачынаць будзем са страчанага часу», – піша пісьменніца.

bialacki

Алесь Бяляцкі, старшыня праваабарончага цэнтру «Вясна», былы палітвязень, які правёў 3 гады ў турме, перадусім звяртае ўвагу на тое, што «Белсат» – інкубатар незалежнай журналістыкі.

«Існаванне тэлеканалу «Белсат» мацуе беларускую грамадзянскую супольнасць, пазбаўляе людзей высокага ўзроўню страху».

feaa92c7_de5a_477d_9d04_5b7a76f1f90d_cx37_cy3_cw63_mw1024_s_n_r1

Мікола Статкевіч, кіраўнік сацыял-дэмакратычнай партыі «Грамада», шматгадовы палітычны вязень, нагадвае ў сваім лісце, як выглядае медыя-прастора Беларусі:

«У тэлевізійнай прасторы Беларусі пануе Расея. Напрыклад, з 8 тэлевізійных эфірных каналаў, якія ўваходзяць у бясплатны для насельніцтва пакет, толькі 3 – беларускія, астатнія – расейскія».

Палітык мяркуе, што праз гэта беларусы прымаюць крамлёўскі пункт гледжання, і менавіта пад уплывам расейскіх медыяў пераважная большасць беларусаў падтрымала анексію Крыму і ўхваляе дзеянні Расеі на Данбасе.

«З кожным годам усе болей беларусаў глядзіць «Белсат» – нашую адзіную абарону ад расейскай тэлевізійнай агрэсіі. «Белсат» ведаюць ва ўсіх кутках Беларусі. Дзякуючы прафесійнай і самаахвярнай працы яго супрацоўнікаў, давер да адзінага беларускага тэлевізійнага каналу расце».

get_img

Жанна Літвіна, стваральніца і экс-старшыня Беларускай асацыяцыі журналістаў, падкрэслівае ўнікальнасць «Белсату».

«Унікальнасць гэтага праекту – у тым, што яго журналісты без аніводнай журналісцкай акрэдытацыі за ўсе гады працы ўнутры краіны здолелі пабудаваць прафесійны СМІ, які даносіць да беларусаў тую частку інфармацыі, якую замоўчвае або свядома скажае дзяржаўнае тэлебачанне».

1280px-Alaksandar_Milinkevich

Аляксандр Мілінкевіч, старшыня руху «За свабоду», кандыдат на прэзідэнцтва ў 2006 годзе, параўноўвае «Белсат» з такімі медыямі, як радыё «Вольная Еўропа», якое ў часы камунізму было крыніцаю свабоднага слова для палякаў.

«Уплыў «Белсату» расце. Яго глядзяць найбольш у меншых гарадах і вёсках, дзе няма кабельнага тэлебачання. Ён там, дзе патрэба ў праўдзівай вольнай інфармацыі найбольшая… Цяпер у інфармацыйнай прасторы Беларусі дамінуе «русский мир». Без «Белсату» мы канчаткова прайграем Крамлю барацьбу за геапалітычны выбар краіны».

20130113_163401

Станіслаў Шушкевіч, першы кіраўнік незалежнай Беларусі, у лісце падтрымання піша:

«Для грамадзянаў Беларусі, якія імкнуцца стаць грамадзянамі суверэннай незалежнай краіны і якім перашкаджае гэта зрабіць не толькі цемрашальства ўлады Беларусі, але і ашалелая расейская імперская тэлевізійная прапаганда, «Белсат» – глыток свежага інфармацыйнага паветра».

 

nekliaev

Уладзімір Някляеў, старшыня руху «За дзяржаўнасць і незалежнасць Беларусі», кандыдат на прэзідэнцтва ў 2010 годзе, зазначае:

«Белсат» – адзіны на ўсю Беларусь тэлевізійны канал, які дае грамадству аб’ектыўную інфармацыю… Апроч таго, ён – адзіны беларускамоўны канал, які фармуе і пашырае не толькі дэмакратычныя погляды, але і нацыянальную свядомасць, што, як паказвае досвед Украіны, ёсць вельмі важным чыннікам у адстойванні дзяржаўнасці і незалежнасці краіны».

Лісты падтрымання скіраваныя ў Міністэрства замежных справаў Польшчы – галоўнага спонсара «Белсату», а таксама да замежных донараў каналу.

belsat.eu

Глядзі таксама
Каментары