Прынамсі тры чалавекі былі забітыя падчас артылерыйскага абстрэлу ва ўсходняй частцы Данецку.
«Гэта быў не адзін снарад. Гэта быў залп. Адзін і другі снарад выбухнулі ў адзін час», – распавёў агенцтву «Reuters» сведка падзеяў.
Прарасейскія сепаратысты паведамлялі першапачаткова, што загінула 15 асобаў. Прадстаўнікі ДНР сцвярджаюць, што шпіталь абстралялі з рэактыўнай сістэмы «Ураган» украінскія войскі.
Раней украінскі бок заяўляў, што цягам апошніх содняў сепаратысты забілі 2 украінскіх жаўнераў і ранілі 18 асобаў. Цягам апошніх 24 гадзінаў сепаратысты здзейснілі каля 80 артылерыйскіх або ракетных атак на ўкраінскія пазіцыі.
Цягам 9 месяцаў, якія трывае канфлікт на Данбасе, загінулі больш за 5 тыс чалавек.
МЯ, belsat.eu
