Штода: Прыходжу да віцэ-прэм'ера, прыём адкладзены, на выхадзе здрадніцкае затрыманне
Пасля адбыцця 15-соднявага арышту грузаперавозчык, які збіраўся ладзіць акцыю ля Дому ўраду, распавядае, як патрапіў на Акрэсціна.
«Я прыходжу спакойна, даведваюся што прыём (у першага віцэ-прэм‘ера Васіля Мацюшэўскага) раптоўна перанеслі на наступны дзень ці пазней. Па выйсці я быў затрыманы, зразумела, я лічу, па-здрадніцку. За нібыта нецэнзурную лаянку», – заявіў на сённяшняй прэс-канферэнцыі Сяргей Штода.
Па словах Сяргея Штоды, АМАПаўцы распавялі яму, што затрыманне праводзілася па загадзе КДБ.
Акцыя грузаперавозчыкаў у выніку не адбылася, таму што была дамоўленасць пра яе правядзенне толькі пасля тэлефанавання Сяргея Штоды па выніках сустрэчы з віцэ-прэм‘ерам. Так як бізнесовец быў затрыманы, то нікому не тэлефанаваў. Ён кажа, што на Акрэсціна для затрыманых падрыхтавалі два паверхі.
«Туды можна змясціць 500 чалавек», – заўважае Сяргей Штода.
Рахунак за знаходжанне на Акрэсціна – 1, 350 млн рублёў бізнесовец збіраецца адаслаць Мацюшэўскаму. Свае бліжэйшыя планы агучваць ён не стаў, але сказаў, што не будзе дзейнічаць так адкрыта, як раней, цяпер будзе больш асцярожным.
