Што смачнага спакаваць дзіцяці з сабой у школу (ці сабе на працу), каб дзень атрымаўся ўдалым? Раіць вядоўца тэлешоу «Я не буду гэтага есці», шэф-кухар міжнароднага класу Вольга Прыгарава. Новыя серыі тэлешоу – ужо неўзабаве па нядзелях, а пакуль трымайце рэцэпты.
Сэндвіч з джэмам ці арахісавай пастай
На 1 сэндвіч:
- хлеб для тостаў (тыпу «Harry’s») – 2 лусты
- джэм, напрыклад, грушава-бруснічны або арахісавая паста
- сметанковае масла
Падсушваем хлеб на грылі або ў тостары, змазваем густым джэмам ці арахісавай пастай, складаем разам. Змазваем з абодвух бакоў сметанковым маслам і абсмажваем да залацістай скарыначкі.
Круасан з вяндлінаю і сырам
- круасан – 1 шт.
- соус на выбар
- лісце салаты – некалькі штук
- памідор – некалькі скрылікаў
- вяндліна – 2 скрылікі
- сыр – 2 скрылікі
Круасан разразаем уздоўж, падсушваем палавінкі на грылі, змазваем соусам (каму які падабаецца), кладзем лісце салаты, скрылікі помідора, вяндліны і сыру.
Кукуруза з сасіскамі
- кукуруза – пару кіяхоў
- сасіскі – некалькі штук
Кукурузу варым у падсоленай вадзе, наразаем на кавалачкі таўшчынёю 3–5 см і абсмажваем на грылі, потым абсмажваем сасіскі. У якасці гарніру можна таксама зрабіць салатку з агародніны, пюрэ з морквы ці бульбяное.
Калі вы любіце гатаваць, сачыце за абнаўленнямі на nebudu.belsat.eu, а таксама: на Facebook, у «Одноклассниках» і ў Instagram.
