Здараецца, што заходняму гледачу на талерачцы разам з любімым серыялам тэлевізіёншчыкі падносяць незвычайны і незнаёмы інгрэдыент: згадку пра Беларусь. І далёка не заўсёды краіна прадстаўлена такой, якая яна ёсць насамрэч. Belsat.eu падрыхтаваў ТОП 5 серыялаў, дзе Беларусь зʼяўлецца нечакана ды здзіўляе не толькі гледача на Захадзе, але і ўласна беларусаў.
У серыяле жахаў Беларусь згадваюць двойчы. Першы раз – у 17 серыі 6 сезону анёл Касціэль, ратуючы братоў Вінчэсцераў, пераносіць іх у беларускі лес. Другі – у 8 серыі 12 сезону падчас нарады прэзідэнта ЗША, у цела якога ўсяліўся дэман Люцыфер.
Сакратарка распачынае нараду:
– Пакуль Вас не было ў Вашынгтоне, у Беларусі былі сарваныя перамовы паміж урадам і паўстанцамі. Мы адклікаем пасла Харкіна. Сэр, можа варта прыцягнуць ААН?
На што прэзідэнт, апантаны дэманам, адказвае:
– Ці проста шарахнуць па іх ядравай бомбаю!
Пасля чаго прэзідэнт моцна рассмяяўся.
У 1 сезоне 4 серыі агенты звышсакрэтнай службы Ш.Ч.Ы.Т. трапляюць у Беларусь, у Віцебскую вобласць, у неіснуючы гарадок Злода. Місія – знайсці загадкавую злачынцу Мадур.
Адна з агентак пачынае дыялог:
– Дзіўна, з дзяцінства хацела пабываць у Злодзе.
– Злода ў Беларусі? Мара спэўнілася?
– Тут нарадзіўся Нобэлеўскі лаўрэат па фізіцы Жарэс Алфёраў, ён канешне з Віцебску, але да яго менш за гадзіну язды адсюль. Сумна, што ты гэта не ведаў.
Знакаміты фізік Алфёраў сапраўдны нарадзіўся на Віцебшчыне, аднак, у гарадку Чашнікі.
Адметна, што стваральнікі серыялу зрабілі ўсе подпісы па-беларуску. Часам у кадры чуецца беларуская мова. А аўтамабільныя нумары вельмі падобныя да сапраўдных.
У 5 серыі 2 сезону серыялу галоўная гераіня – спецагент Нікіта з паплечнікамі павінна забіць беларускага прэзідэнта Валерыя Авечкіна. Дакладней двайніка прэзідэнта, які выйшаў з-пад кантролю, забіў сапраўднага прэзідэнта ды пераўтварыўся ў дыктатара.
«Пасля шасці гадоў стабільнасці ён абвясціў у краіне ваеннае становішча. Гэта адбылося пасля таго, як асабістага памочніка прэзідэнта забілі», – гаворыцца ў серыяле.
Па ходу серыі становіцца зразумела, што Беларусь прадстаўлена, як краіна, дзе адбыўся «самы ціхі ў свеце» пераварот. А яшчэ паказана, што ўсе СМІ цалкам падкантрольныя псеўда-прэзідэнту.
Цікава, што дом прэзідэнта нагадвае невялічкі каменны катэдж з двума нацыянальнымі сцягамі.
У 3 серыі 1 сезону Шэрлак Холмс прыехаў у Менск, зацікавіўшыся новым расследаваннем. Аднак, вельмі хутка губляе цікавасць да гэтага злачынства:
«А як жа справа ў Расеі?», – пытаецца доктар Ватсан.
«У Беларусі. Звычайнае побытавае забойства. Не вартае маёй увагі», – адказвае яму Холмс.
У кадры Шэрлак Холмс паўстае на фоне дзяржаўнага чырвона-зялёнага сцяга ды вядзе размову са зняволеным у турме.
У другім сезоне серыялу для маладзёнаў «Пляткарка» з’яўляецца прынц Аляксей з Беларусі. У адным з начных клубаў прынц спрабуе пазнаёміцца з гераіняй серыялу – Джарджынай: «Я не мог не заўважыць вас. Я прынц Аляксей з Беларусі» – пачынае ён дыялог. На што дзяўчына раздражнёна адказвае: «Як цудоўна, што яшчэ можна сустрэць прынца».
Настырны прынц спрабуе пахваліцца: «Я адлятаю назад у сваю краіну, каб святкаваць адкрыццё майго новага нафтаправода. Далучыцца не жадаеце?» – гераіня яшчэ больш раздражнёна – «Вы ведаеце, я вучуся ў каледжы і не ведаю, што цяпер вам адказаць, прынц!». Пасля чаго хутка сыходзіць. Пазней становіцца вядома, што прынц з Беларусі насамрэч не прынц, а звычайны прыслуга з Менску і яго завуць Ваня.
МД, belsat.eu