За некалькі дзён група «Wileńska Republika Ludowa – Виленская Народная Республика», якая распаўсюджвае сепаратысцкія настроі ў Літве, набрала ў «Фэйсбуку» больш за 1200 падпісантаў.
Чалец парламенцкай фракцыі «Саюз айчыны-Хрысціянскія дэмакраты Літвы» Арвідас Анушаўскас звярнуўся ў Генеральную пракуратуру Літвы з просьбай расследаваць, хто ў сацыяльнай сетцы «Фэйсбук» стварыў старонку на польскай мове «Wileńska Republika Ludowa – Виленская Народная Республика».
«Нягледзячы на тое, што гэта назвалі правакацыяй, да гэтага часу пракуратура не распачала ніякага расследавання. Паколькі канстытуцыйныя каштоўнасці – суверэнітэт рэспублікі і тэрытарыяльная цэласнасць – трэба абараняць ад любых выпадаў, я звяртаюся ў Генпракуратуру з просьбай расследаваць, выявіць ініцыятараў», – цытуе прэс-рэліз літоўскага дэпутата delfi.lt.
На думку спадара Анушаўскаса, «Генпракуратура, абараняючы канстытуцыйныя каштоўнасці, павінна неадкладна рэагаваць, каб не было ілюзіі беспакаранасці».
Паводле яго слоў, нягледзячы на відавочны почырк расейскіх спецслужбаў (такія ж ідэі трансляваліся 25 гадоў таму), гэта не азначае, што падобныя выпадкі не трэба расследаваць.
«Мы – не «расейцы», не «правакацыя Пуціна» і гэтак далей, – пішуць стваральнікі суполкі. – Мы – польскія патрыёты, і, як такія, адказваем за супрацу палякаў, расейцаў і беларусаў у Літве з мэтаю вызвалення з-пад ярма шавіністычнага, жмудзінскага ўраду, які дыскрымінуе і пераследуе ўсе гэтыя меншасці».
Мадэратары суполкі падкрэсліваюць, што назва «Народная», якую яны выкарыстоўваюць, – гэта аднясенне да гэтак званых Народных Рэспублік Данецку і Луганску. «Сітуацыя ў віленскім рэгіёне падобная да той, што на Данбасе да вайны, і мы не маем намеру ігнараваць гэтую аналогію», – пішуць стваральнікі групы. Яны просяць інтэрнаўтаў не кантактаваць з імі непасрэдна, а раяць весці дзейнасць, якая не падпадае пад артыкулы Крымінальнага кодэксу, напрыклад, пісаць на сценах: «Віленская Народнай Рэспубліка прыйдзе!».
«Пачаткі заўсёды сціплыя, а першыя крокі – найцяжэйшыя», – пішуць стваральнікі групы.
«Нашая крыніца, які пажадала застацца неназванай, паведаміла, што праект – гэта не толькі віртуальная правакацыя, колькасць яго рэальных паслядоўнікаў расце, – пісаў радыкальна-правы польскі сайт xportal.pl, галоўны рэдактар якога Барташ Бэкер наведаў летась сепаратыстаў на Данбасе. – Паводле той жа крыніцы, планы стварыць «Віленскую Народную Рэспубліку» штораз больш падтрымліваюць дыскрымінаваныя расейцы і беларусы».
Літоўскія медыі і польскія дзеячы ў Літве назвалі дзейнасць групы «таннай правакацыяй» і «распальваннем нацыянальнай нянавісці». «Гэтыя асобы павінны добра падумаць, да чаго яны імкнуцца. Мне гэта нагадвае толькі страўліванне людзей», – цытуе словы сакратара Саюзу палякаў Літвы Эдварда Трусэвіча польская «Gazeta Wyborcza».
МЯ, паводле delfi.lt, wyborcza.pl
