Сёння падчас паседжання ў судзе Менскага раёну прапаршчык Артур Вірбал і лейтэнант Павел Сукавенка, якія былі камандзірамі ў роце, дзе загінуў Коржыч, у апошнім слове цалкам прызналі сваю віну.
Абодва папрасілі суд прызначыць пакаранне, не звязанае з пазбаўленнем волі.
«Я прызнаю сваю віну ў злачынстве, каюся, але мэты прынізіць або прынесці маральныя пакуты я не ставіў. Усе пацярпелыя, якія выступалі на судзе, казалі, што не адчувалі ніякага ціску і не лічаць сябе пацярпелымі. Я прашу ўлічыць гэта пры выстаўленні прысуду», – сказаў Сукавенка.
«Прашу не караць сувора, бо я здольны прынесці карысць грамадству і сваёй сям’і», – дадаў ён.
Прапаршчык Вірбал таксама прызнаў віну «ў поўным аб’ёме» і прынёс прабачэнні пацярпелым «за любую нанесеную шкоду».
«Я цалкам згодны з абвінавачаннем, цалкам прызнаю сваю віну і чыстасардэчна каюся. Таксама абвінавачанне мяркуе, што я нанёс пацярпелым фізічны боль, маральныя пакуты і прыніжэнне. Але і падчас следчых дзеянняў, і на мінулых судовых паседжаннях пацярпелыя сцвярджалі, што гэта не было прыніжэннем, не нанёс я ім болю ды пакутаў. Правільна, гэта не выглядала, як прыніжэнне. Проста хацелася неяк узбадзёрыць, настроіць на працоўны лад, каб ведалі і разумелі, што заданні, якія мы ставім, мусяць выконвацца. Узнікалі моманты, калі пэўныя заданні ігнараваліся, не хацелі іх выконваць, знаходзілі адмазкі», – сказаў Вірбал.
«Праз год я разумею, што рабіў няправільна. Трэба было дзеяць па-іншаму – праводзіць размовы, выстаўляць у нарады…»
Вірбал заявіў, што ў эпізодах, звязаных са злоўжываннем уладаю, насамрэч «не хацеў нейкім чынам падняць свой аўтарытэт або зрэалізаваць амбіцыі».
Прапаршчык дадаў, што мае намер «працаўладкавацца і прыносіць карысць сям’і», таму просіць не накіроўваць яго ў месцы пазбаўлення волі.
Прысуд у справе агучаць а 14:30 19 кастрычніка.
КА, belsat.eu