21 траўня Беларусь і Арменія адмовіліся падпісваць дэкларацыю саміту «Усходняга партнёрства».
Чытай таксама >>> Парашэнка: Беларусь адмовілася прызнаць анексію Крыму
Адказваючы на пытанне журналістаў, ці засталася ў дэкларацыі фармулёўка «анексія Крыму», прэзідэнт Літвы Даля Грыбаўскайце сказала: «Вядома, без гэтага дэкларацыя не была б прынятая».
22 траўня на з’ездзе Федэрацыі прафсаюзаў у Менску Аляксандр Лукашэнка заявіў, што Беларусь не падпіша дакументаў саміту «Усходняга партнёрства» з антырасейскімі выказваннямі.
«Украінскія падзеі павінны былі ўсіх навучыць, як трэба берагчы мір. Трэба глядзець на галоўнае, вырашаць гэтую праблему, у тым ліку і ва Украіне, іншых дзяржавах. Не, сабраліся на «Усходняе партнёрства». І што? У кожным дакуменце кляймяць ганьбай Расею, не наўпростава, дык ускосна», – сказаў Лукашэнка.
Беларусь падтрымала дэкларацыю Рыжскага саміту Усходняга партнёрства ў цэлым, але з агаворкамі. Пра гэта міністр замежных спраў Беларусі Уладзімір Макей заявіў журналістам па заканчэнні афіцыйнай часткі саміту, піша euroradio.fm.
«Галоўнае ў сённяшняй сітуацыі не зрабіць гучную заяву на адрас кагосьці, а спрабаваць вырашыць тыя праблемы, якія з’яўляюцца актуальнымі для нашага кантынента: забяспечыць мір, стабільнасць і бяспеку ў рэгіёне. І найперш – вырашыць украінскі крызіс. Таму мы ад пачатку былі супраць такіх канфрантацыйных заяў і выступалі за тое, каб фармулёўкі былі арыентаваныя на далейшае развіццё ініцыятывы »Усходняе партнёрства«, якая магла б спрыяць развіццю нашых краінаў-удзельніц. Таму заключная версія дэкларацыі была для нас непрымальная, і мы, з улікам таго, што ў гэтай дэкларацыі ўтрымліваецца шэраг важных для Беларусі момантаў, мы ў цэлым падтрымалі яе, але зрабілі дакладную заяву адносна непрымальных для нас пасажаў у гэтай дэкларацыі», – заявіў кіраўнік беларускага МЗС.