Беларускія прадпрыемствы ўмеюць шыць недарагую і якасную вопратку з натуральных матэрыялаў. А вось над дызайнам можна яшчэ папрацаваць. У гэтым пераканаліся журналісты «Белсату» на выставе-распродажы тавараў айчыннай лёгкай прамысловасці.
Сярод тыповага беллёгпрамаўскага адзення можна адшукаць такія экзэмпляры, што нават не зразумела, хто і куды мог бы гэта насіць.
Геаграфія вытворцаў шырокая – на выставе была прадстаўленая ўся Берасцейшчына, а таксама вытворцы з Салігорску, Бабруйску і нават Наваполацку.
Зніжкі – ад 15 да 50%. Адзіны недахоп – плаціць можна было толькі наяўнымі. Апрануць дзіцё з ног да галавы ў такі любімы ў народзе камуфляж можна было за 30 рублёў, набыць жаночую начную кашулю – за 15 рублёў, столькі ж каштуе жаночы баваўняны халат.
Вязаны жакет ад гарадзенскай фірмы «Катти-А» будзе ваш за 60 рублёў, у два разы танней – жаночая камізэлька ў стылі загадчыцы склада, зробленая ў Любані.
Алесь Ляўчук, Мілана Харытонава (фота), belsat.eu