Польскі звяз гандболу: На матчы беларусаў больш не будзе гучаць «Кацюша»

video

Савецкая песня не будзе суправаджаць матчы беларускіх гандбалістаў, паабяцала прадстаўніца Польскага звязу гандболу. «Кацюшу» маглі ўключыць памылкова, але нікога пакрыўдзіць не хацелі.

Падчас апошняй гульні зборнай Беларусі па гандболе ў катавіцкай арэне «Сподэк» галы беларусаў суправаджаліся гукамі песні «Кацюша».

Гэтая песня больш бы адпавядала гульням расейцаў. Незвычайны музычны выбар адзначылі і каментатары Сяргей Новікаў ды Уладзіслаў Татур, якія агучвалі трансляцыю гульні на тэлеканале «Беларусь 5».

Чаму выбралі менавіта «Кацюшу» патлумачыла каардынатарка па арганізацыі і прамоцыі і па перадтурнірных падзеях Польскага гандбольнага звязу Магдалена Гаманд (Magdalena Hammond).

Магдалена Гаманд: Для кожнага матчу рыхтуецца музычнае афармленне. Тут аднолькава хочам забаўляць заўзятараў з Польшчы, так і тых, хто прыязджае з краінаў-удзельніц чэмпіянату Еўропы, а таксама саміх спартоўцаў. У сувязі з гэтым выбіраем не толькі творы, вядомыя ды любімыя з 1970-ых, 80-ых і 90-ых гадоў, а таксама і сучасныя песні, што гучаць на радыё. У той жа час, выбіраючы песні з краінаў, што бяруць удзел у чэмпіянаце, мы кансультуемся з камандамі і федэрацыямі. І так было ў выпадку з Беларуссю.

Калі гаварыць пра «Кацюшу», то тут проста магла здарыцца памылка, вядома, мы не хацелі кагосьці пакрыўдзіць. Вельмі дзякую за рэкамендацыі, будзем пераглядаць наш рэпертуар.

Belsat.eu: То бок «Кацюшы» на матчах беларускіх гандбалістаў цяпер не пачуем?

Магдалена Гаманд: Не будзе гучаць, не. Беларуская каманда цяпер прыехала ў Кракаў, тут крыху іншая атмасфера, іншы дыджэй. Стараемся, каб рэпертуар быў стандартны, наколькі магчыма – падобны. Бо і заўзятары пераважна падобнага веку, таму музыку на арэне стараемся ўніфікаваць. Але пры гэтым мы даём далікатнае поле манеўру для кожнай каманды дыджэяў.

Наступны матч нашая гандбольная зборная праводзіць сёння – супраць Францыі. Пачатак а 20:15.

Зміцер Кустоўскі, belsat.eu

Тэгі: 
Глядзі таксама
Каментары