Лоеўскія міліцыянты даслалі журналістам-фрылансерам цэлых шэсць пратаколаў на дваіх.
Чатыры з іх атрымаў поштай Кастусь Жукоўскі, яшчэ два – Аляксей Атрошчанка.
Два пратаколы на Жукоўскага складзеныя нібыта за абразу мясцовых чыноўнікаў: кіраўніцы справаў Лоеўскага райвыканкаму Ірыны Пастуховай, намесніцы старшыні райвыканкаму па ідэалогіі Наталлі Кауравай, а таксама першага намесніка начальніка РАУС Генадзя Маджары.
Відэасюжэт «Белсату» пра тое, што адбылося ў Лоеве
Трэці пратакол на Жукоўскага – нібыта за непадпарадкаванне Маджару, чацвёрты – за дробнае хуліганства.
Атрошчанку таксама вінавацяць у абразах і непадпарадкаванні.
Інцыдэнт у Лоеве адбыўся 21 чэрвеня. Тады Аляксея Атрошчанку затрымалі падчас здымак і павезлі ў РАУС. З ім працаваў Кастусь Жукоўскі, які таксама паехаў у РАУС.
Там і адбыўся канфлікт з міліцыяй.
Кастусь Жукоўскі кажа, што намеснік Лоеўскага РАУС Генадзь Маджара разам з нейкім чалавекам у цывільным пачалі ўжываць супраць яго сілу: сталі душыць і прыціскаць галаву нагой да долу.
Пасля Кастусь Жукоўскі напісаў заяву ў Следчы камітэт па факце збіцця і зняў пабоі. Цяпер чакае вынікі праверкі.
Каментуючы інцыдэнт, міністр унутраных справаў Ігар Шуневіч паабяцаў разабрацца, ці парушалі лоеўскія міліцыянты закон падчас затрымання.