Памёр Ягор Пратасеня, які на пачатку года зрабіў спробу самагубства ў жодзінскай турме

video

Хлопец памёр а 14 гадзіне ў Салігорску, у сваёй кватэры. Тры тыдні таму маці Святлана забрала яго з салігорскага шпіталю і глядзела яго сама, але ў апошнія дні ягоны стан пачаў пагаршацца.

«Лекары сказалі ўчора, што мала яму засталося. Сёння ён чакаў мяне, ляжаў з адкрытымі вачыма. Я прыйшла ў абед з працы, ён быў жывы, прыбрала яго, і тут гэта пачалося, і хутка ён памёр у мяне на руках. Сяджу вось каля яго. Яшчэ не прыехала міліцыя і лекары, чакаю. А з комы ён так і не выходзіў. Стаў зусім слабы мой сыночак, і вось – усё. Усяго 20 гадкоў пажыў».

Напрыканцы 2015 года Салігорскі раённы суд асудзіў жыхара Салігорску Ягора Пратасеню на 14 гадоў зняволення за распаўсюд наркотыкаў. Пазней Менскі абласны суд прысуд пацвердзіў, але вызваліў Ягора Пратасеню ад адказнасці з прычыны стану здароўя асуджанага. З пачатку году Ягор Пратасеня быў у коме пасля няўдалай спробы самагубства ў жодзінскай турме.

4–5 студзеня Ягор Пратасеня ў адзіночнай камеры спрабаваў павесіцца, яго дасталі з пятлі ахоўнікі. Міліцыянты сказалі, што ў пятлі вязень прабыў нязначны час, аднак Святлана Пратасеня ў гэта не верыла і падазравала міліцыянтаў у нядбайнасці. Маці спасылалася на дрэнныя наступствы, бо сын трапіў у кому. Ягора Пратасеню ў стане комы спачатку трымалі ў жодзінскім шпіталі, потым у шпіталі ў менскім ізалятары на вуліцы Валадарскага, а 4 сакавіка прывезлі ў салігорскі шпіталь.

На спатканні з маці пасля вынясення прысуду ў снежні 2015 года і ў ранейшых лістах да яе з калоніі Ягор Пратасеня распавядаў пра катаванні і здзекі з боку оперупаўнаважаных салігорскай управы наркакантролю, якія, як ён лічыў, сфальцавалі ягоную справу. Хлопец папярэджваў, што на знак пратэсту і каб адпомсціць міліцыянтам скончыць жыццё самагубствам. Святлана Пратасеня пасля гэтых сігналаў сына звярталася ў міліцыю і пракуратуру, каб правялі дадатковае правяранне справы ейнага сына.

У студзені 2016 года Следчы камітэт Беларусі распачаў правяранне спробы самагубства Ягора Пратасені ў жодзінскай турме. Ці вядомыя яго вынікі?

«Афіцыйна мне нічога не паведамілі, але якраз учора я званіла ў Следчы камітэт, і там сказалі, што ніхто ў гэтым не вінаваты, толькі ён сам. Сказалі, што скончылі правяранне і якраз друкуюць мне тую паперу, але яшчэ не атрымала. Значыць ніхто не вінаваты, і працаўнікі наркакантролю Салігорску ні пры чым? Чаму ж тады лісты ягоныя з турмы ў мяне так і не забралі для правярання, не адзін толькі жнівеньскі ліст, а ўсе, з пачатку мінулага года, дзе ён пісаў пра здзекі і фальшаванне справы? Канечне, крумкач крумкачу вока ня выдзеўбе…», – сказала Святлана Пратасеня.

ЮВ, belsat.eu, паводле svaboda.org

Глядзі таксама
Каментары