Пагоні і георгіеўскія стужкі: 38 народаў прадставілі сваю культуру ў Горадні


Фестываль нацыянальных культураў праходзіць у Горадні ў 11 раз.

Імпрэза, на якой нацыянальныя мяншыні дэманструюць сваю культуру – танцы, музыку, нацыянальную кухню, – сталася для гораду над Нёмнам добрай традыцыяй. Колькасць народаў, якія прэзентуюць сябе на агульным шэсці, на падворках ды агульнай сцэне, штогод расце. Гэтак, сёлета з свяце ўзялі ўдзел прадстаўнікі ЗША, Нігерыі ды Шры-Ланкі.

Народныя майстры, музычныя калектывы ды кухары занялі фактычна ўвесь цэнтр старога гораду. Прыемна здзівіла праца супрацоўнікаў міліцыі: цэнтр гораду не быў перакрыты брамкамі з металашукальнікамі, як звычайна. Пільны кантроль МУС мае з’явіцца толькі ўвечары, падчас канцэрту.

Не абышлося і без палітычных акцэнтаў: на «Расейскім падворку», які месціўся ў самым цэнтры, на Савецкай вуліцы, раздавалі георгіеўскія стужкі ды трыкалоры. Калі журналісты звярнуліся да супрацоўнікаў міліцыі, тыя патлумачылі, што аніякіх прэтэнзіяў да «агітатараў» не маюць, калі стужкі раздаюцца бясплатна.

Афіцыйнай ідэяй фестывалю сёлета стаўся лозунг «сяброўства народаў ды мірнага суіснавання». На фестывалі побач кватаравалі расейскі ды ўкраінскі, армянскі ды азербайджанскі падворкі – і, сапраўды, ніякіх канфліктаў не было.

АК, belsat.eu

Глядзі таксама
Каментары