Сёння суд разгледзіць адміністратыўныя справы ў дачыненні да анархістаў, якіх затрымалі падчас учорашняй пратэставай акцыі.
Пра гэта паведамляе праваабарончы цэнтр «Вясна».
«11 кастрычніка каля 20-й гадзіны недалёка ад плошчы Незалежнасці былі затрыманыя 5 актывістаў анархісцкага руху. Дваіх змясцілі на ноч у цэнтр ізаляцыі правапарушальнікаў на Акрэсціна. Лёс яшчэ траіх высвятляецца», – гаворыцца на сайце арганізацыі.
Вядома, што на анархістаў склалі пратаколы па арт.17.1 КаАП «Дробнае хуліганства», і сёння адбудзецца разгляд адміністратыўных справаў у судзе Кастрычніцкага раёну Менску.
Акрамя таго назіральнікі паведамляюць, што пратакол быў складзены і на 17-галовага Ягора Скрабнеўскага, аднак хлопца адпусцілі.
Падчас учорашняй размовы з журналістамі кіраўнік краіны папярэдзіў апазіцыю пра тое, што выбары заканчваюцца 11 кастрычніка а 20-й, і ад гэтага часу трэба «жыць паводле закону».
Пасля закрыцця выбарчых участкаў у цэнтры Менску сабралася спантанная акцыя пратэсту, якая налічвала 150-200 удзельнікаў.
НМ, belsat.eu