Пад Гомелем усталявалі крыж «Пакутнікам тваім, Беларусь»

video

Удзельнікі валанцёрскага летніка «У пошуках страчанага» ўсталявалі памятны крыж ля вёскі Хальч Веткаўскага раёну, на месцы пахаванняў дзяцей «ворагаў народу».

ЛІДЗІЯ ЛЕШЧАНКА, УДЗЕЛЬНІЦА ЛЕТНІКА:
«Прыехалі мы сюды з сябрамі, каб усталяваць крыж на месцы пахавання дзяцей, якія нараджаліся ў турме, якіх нават не хрысцілі і нармальна не пахавалі».

Дзяцей у жаночай турме НКВД для «ворагаў народу», якая размяшчалася ля вёскі Хальч, памірала шмат. Паводле аповедаў мясцовых жыхароў, хавалі іх спачатку на мясцовых могілках, без крыжоў і помнікаў, а калі месца на могілках не стала – скідалі ў агульную яму. У адным з такіх месцаў актывісты гомельскай «Нашай альтэрнатывы» і ўсталявалі талакою памятны крыж.

ЗМІЦЕР ЯКАЎЦАЎ, УДЗЕЛЬНІК ЛЕТНІКА:
«У мяне ў самога дзед быў рэпрэсаваны і ён казаў, што былі такія часы, а зараз мы жывем у іншы час і трэба проста асэнсаваць гэта і проста памянуць. Тым больш, што гэта былі дзеці. Проста пакінуць нейкі знак, можа з часам тут паставяць нешта іншае».

У савецкія часы на гэтым месцы было ўраўленне калгасу, падчас вайны – нямецкая камендатура, у трыццатыя гады мінулага стагоддзя – турма НКВД. Цяпер жа будынак, гісторыя гаспадароў якога цягнецца ад пятнаццатага стагоддзя, занядбаны і разбураецца. Каб яго аднавіць, патрэбныя шматмільённыя інвестыцыі. Для аднаўлення ж памяці часам дастаткова крыжа. Прынамсі для пачатку.

belsat.eu

Глядзі таксама
Каментары