Оўбама ў ААН: Рэжымы, якія паразітуюць на людзях, рана ці позна рассыпаюцца


U.S. President Barack Obama addresses attendees during the 70th session of the United Nations General Assembly at the U.N. Headquarters in New York, September 28, 2015. REUTERS/Mike Segar

Прэзідэнт ЗША Барак Оўбама ў сваім выступе на пасяджэнні Генеральнай асамблеі ААН згадаў пра анексію Крыму Расеяй.

Паводле ягоных слоў, ЗША ўвялі санкцыі супраць Расеі, бо «не могуць стаяць у баку», калі парушаецца суверэнітэт і тэрытарыяльная цэласнасць Украіны.

Прэзідэнт ЗША адзначыў, што вынікам санкцый стаў эканамічны спад у Расеі, зніжэнне курсу рубля і «эміграцыя адукаваных расейцаў», падае sochi.news.

Пры гэтым Оўбама запэўніў, што ЗША ў сваёй вонкавай палітыцы не імкнуцца да новай Халоднай вайны і ізаляцыі Расеі.

Кажучы пра вайну ў Сірыі, Оўбама назваў сірыйскага прэзідэнта Башара Асада тыранам і ўсклаў на яго адказнасць за масавыя забойствы і рэпрэсіі. Прэзідэнт ЗША выказаў гатовасць сумесна з Расеяй і Іранам працаваць над урэгуляваннем канфлікту ў Сірыі.

Амерыканскі прэзідэнт сказаў, што «тыраны ўчорашняга дня становяцца іскрай заўтрашняй рэвалюцыі».

«Гісторыя паказвае, што рэжымы, якія паразітуюць на людзях, рана ці позна рассыпаюцца. Краіны ж, лідары якіх абапіраюцца на Канстытуцыю – квітнеюць. Я разумею, што дэмакратыя – гэта складана. Але менавіта яна зрабіла ЗША наймацнейшай краінай свету. І гэта не тэорыя, гэта практыка», – заявіў Оўбама.

На пасяджэнні Генеральнай асамблеі ААН мае выступіць прэзідэнт Расеі Уладзімір Пуцін.

МЯ, паводле sochi.news

Глядзі таксама
Каментары