Ніну Багінскую аштрафавалі за пікет ля КДБ. Актывістка: «Няхай задушацца»


Ніна Багінская

Суд Цэнтральнага раёну гораду Менску аштрафаваў грамадскую актывістку Ніну Багінскую на 50 базавых велічыняў (1050 рублёў) за пікет ля будынку КДБ 24 сакавіка. Багінская на працэсе не прысутнічала і пра рашэнне судзі даведалася ад журналістаў.

«Я ж не хаджу на гэтыя суды. Калі я выходзіла на пікет мяне папярэджваў супрацоўнік Цэнтральнага РАУС, што за гэта вы атрымаеце 50 базавых велічынь штрафу. Я толькі паціснула плячыма:у мяне і 50 базавых ужо было, і 40, і 30, але мне ўсё роўна плаціць няма з чаго і я плаціць ня буду. Ну вось далі зараз 50 базавых…Няхай задушацца! Яны ж такім чынам адпрацоўваюць свае зарплаты», – заявіла Багінская ў інтэрвʼю Белсату.

Актывістка лічыць, што яе права выходзіць на мірныя сходы гарантуе Канстытуцыя, таму гэты адміністратыўны пераслед яна не лічыць законным.

«Гэтая ўлада нелегітымная і я ўсе гэтыя штрафы не лічу правільнымі. Яны хочуць застрашыць людзей на маім прыкладзе, а мне толькі смешна ад гэтага», – кажа яна.

24 сакавіка Ніна Багінская выйшла на пікет ля КДБ, патрабуючы спынення рэпрэсіяў і вызвалення палітвязняў, і была затрымана. Потым, ужо пасля Дня Волі, яна працягвала выходзіць да будынку Камітэту дзяржбяспекі на пікеты – у тым ліку яна прымала ўдзел у акцыі салідарнасці з арыштаванымі па «справе баевікоў».

ІІ, belsat.eu

Глядзі таксама
Каментары