Незалежных журналістаў з Глыбокага аштрафавалі агулам на 55 базавых велічыняў


Глыбоцкіх журналістаў Тацяну Смоткіну і Змітра Лупача суд прызнаў вінаватымі ў незаконным вырабе і распаўсюдзе прадукцыі СМІ (арт. 22.9 КоАП).

Суддзя Людміла Вашчанка пастанавіла пакараць Лупача штрафам у 30 базавых велічыняў (690 рублёў), а Смоткіну – у 25 базавых (575 рублёў)

Зміцер Лупач рыхтаваў відэасюжэт для “Белсату” пра дом №142 па вуліцы Леніна ў Глыбокім, які патрабуе капітальнага рамонту.  Пяціпавярховік не рамантавалі ўжо 40 гадоў. Сюжэт выклікаў рэзананс.

Справу ініцыяваў мясцовы аддзел КДБ. Менавіта там загадалі разабрацца, якім чынам інфармацыя пра дом трапіла ў СМІ. На журналіста Змітра Лупача міліцыя склала два пратаколы , бо жыхары дому засведчылі, што бачылі Змітра там двойчы. Другі раз ён прыходзіў з Тацянай Смоткінай.

Тацяна жыве ў тым самым доме №142 і неаднаразова абуралася станам свайго жылля, аднак у ЖКГ казалі, што грошай на рамонт у бюджэце няма. Хаця самі жыхары дому рэгулярна збіралі грошы і пералічвалі камунальнікам.

У судзе Смоткіна заявіла, што не мае працоўных адносінаў з “Белсатам”, а Лупач адмовіўся даваць паказанні.

Раней журналістаў-фрылансераў ужо прыцягвалі адміністратыўнай адказнасці. Гэтак, у 2015 годзе Тацяну Смоткіну пакаралі штрафам памерам 25 базавых велічыняў за матэрыял для Беларускага Радыё Рацыя. На такую ж суму быў аштрафаны Зміцер Лупач за матэрыял для “Еўрарадыё”.

КА, belsat.eu  фотаздымак svaboda.org

Глядзі таксама
Каментары