МАЗ не трапіў у расейскую праграму субсідавання і цяпер саступае пазіцыі на расейскім рынку заходнім вытворцам. Такім меркаваннем з tut.by падзяліўся гендырэктар Менскага аўтазаводу Дзмітрый Кацярыніч.
Па выніках першага паўгоддзя 2017 года грузавікі «Volvo», «Scania» і «Mercedes-Benz» выцяснілі МАЗ з трэцяга месца на шостае.
Гэтыя кампаніі адкрылі ў РФ свае зборачныя заводы і знаходзяцца ў дзяржаўных праграмах субсідавання.
«Мы гэтым пахваліцца не можам. Не пускаюць нас туды. Хоць на МАЗах рухавік з яраслаўскага заводу, скрынка перадач таксама расейская, метал набываем у Расеі. Мы лічылі, у нас 2400 пазіцый – расейскія», – распавёў Кацярыніч.
