На сайце нацыянальнага аэрапорту Менск з’явілася абвестка пра пачатак кампаніі «таемны пасажыр». Каб стаць удзельнікам, трэба запоўніць заяўку.
У межах акцыі будзе правярацца якасць наступных паслугаў:
- транспарт;
- паркоўкі;
- перасоўванне па аэрапорце;
- сфера паслугаў у аэрапорце;
- атрыманне інфармацыі;
- чысціня і атмасфера ў аэрапорце;
- абслугоўванне па вылеце;
- абслугоўванне па прылёце.
Таксама заклікаюць прыняць удзел у праграме асобаў з абмежаванымі магчымасцямі. Яны будуць ацэньваць паслугі па суправаджэнню, якасць спецтэхнікі і безбарʼернае асяроддзе аэрапорту.
«На падставе атрыманай інфармацыі адміністрацыя зможа прымаць аператыўныя рашэнні па паляпшэнню якасці абслугоўвання, робячы аэрапорт больш камфортным, бяспечным і гасцінным», – паведамляецца на сайце аэрапорту.
Самыя актыўныя ўдзельнікі праграмы будуць узнагароджаныя. Іх чакаюць падарункі ад аэрапорту: памятныя сувеніры і сертыфікаты на бясплатнае абслугоўванне ў бізнес-залах Нацыянальнага аэрапорту Менск.
ГА, belsat.eu
