«Народны альбом» паставяць на опернай сцэне


Напярэдадні свайго 20-годдзя «Народны Альбом» стане музычным спектаклем. Тэлеканал «Белсат» выступае аўтарам ідэі і выканаўчым прадзюсарам спектаклю.

4 верасня ў Падляскай оперы ў Беластоку ў межах фестывалю «Усход культуры. Іншае вымярэнне» адбудзецца прэмʼера спектаклю «Народны альбом. 20 год». Рэжысёр прадстаўлення – Конрад Смуга.  Аўтар сцэнару – Матвей Сабураў, аўтар многіх кліпаў «Ляпіса Трубяцкога», «The Toobes», «Без Білета» ды рэжысёр «Сашы і Сірожы».

Арганізатары абяцаюць, што галоўнымі героямі стануць як удзельнікі таго самага альбому – а гэта каля 25 асобаў, – гэтак і новыя людзі.

Галоўны музычны артэфакт 90-х

«Народны альбом» быў запісаны ў 1997 годзе ў былой студыі легендарнага радыё «101,2», і стаў адной з найбуйнейшых культурніцкіх з’яваў незалежнай Беларусі: ён аб’яднаў не толькі больш за два дзясятка ягоных творцаў, але і тысячы слухачоў па ўсёй краіне.

Гэтак, настаўнік беларускай мовы Сяргей Скурат у прысвечаным альбому фільме «Шлях да мроі» кажа, што на той момант песні з альбому былі фантастычнаю знаходкаю: іх можна было і спяваць, і чытаць, і распавядаць. Сам Сяргей не раз браў гітару на свае ўрокі.

І колькі дзяцей па ўсёй краіне спявала «Настаўніка Рагойшу» на занятках па мове, літаратуры, гісторыі ды музыцы – невядома. Дзеля справядлівасці варта адзначыць, што беластоцкая прэмʼера будзе другой спробай інсцэнізаваць кружэлку: упершыню спектакль паводле матываў «Народнага альбому» паставілі вучні коласаўскага ліцэю.

Альбом паўстаў дзякуючы браку грошай

Альбом апраўдвае сваю назву. «Падчас запісу альбома пахлопвалі і падтоптвалі не толькі музыкі ды супрацоўнікі «Радыё 101,2», але і ахоўнікі студыі разам з левымі людзьмі. Я заходзіў да іх і спойваў, дражніў іх каньяком. Так ці інакш у працэсе стварэння альбома прынялі ўдзел каля 25 чалавек», – прыгадваў тую працу Аляксандр Памідораў, які выканаў для альбому народную габрэйскую песню «Lomir zich iberbetn».

Гэты калектыўны дух разняволенай творчасці яднаў усіх стваральнікаў і праз 10 гадоў пасля запісу. З’яднае, імаверна, і цяпер.

«Для мяне «Народны альбом» застаецца выспай шчырасці, калі абсалютна чужыя людзі становяцца ў «Народным альбоме» адной сям’ёй», – казала напрыканцы двухтысячных Кася Камоцкая, жаночы голас кружэлкі.

Стары добры «Народны альбом» на новым узроўні

Трымацца разам такой колькасці абсалютна розных людзей ды стварыць альбом-ікону музыкантам дапамагла, паводле іроніі, адсутнасць грошай і якой-кольвек дысцыпліны.

«Ніхто не баяўся рабіць нешта дурнаватае. Міхал Анемпадыстаў пісаў проста бесперапынна паміж асноўнай працай і працай над праектамі; я думаю, ён не вельмі гэтыя тэксты і рэдагаваў. Нашай задачай было не сапсаваць ягоныя тэксты сваймі трыма акордамі. Усё рабілася так па-дурному, часам гралі цалкам крыва, не парыліся наконт таго, як будзе гучаць тая ці іншая музыка. Усё было вельмі разняволена», – прыгадвае працу над праектам Лявон Вольскі.

Паводле Вольскага, вераснёўская прэмʼера не будзе канцэптуальна адрознівацца ад арыгіналу.

«Гэтым разам будзе граць цэлы аркестр – 20 музыкаў. Бо ўсё мусіць адбывацца ў беластоцкай оперы, а гэта грандыёзная па памерах і тэхнічных магчымасцях пляцоўка. У Беларусі нічога падобнага няма. Таму мы пашырылі склад удзельнікаў і будзем рабіць новыя аранжыроўкі песень. То бок гэта будзе стары добры «Народны альбом», але на якасна вышэйшым узроўні», – кажа Вольскі.

Спектакль «Народны альбом. 20 год» стане часткаю фестывалю «Wschód Kultury. Inny Wymiar» («Усход культуры. Іншае вымярэнне»), каардынаванага Беластоцкім цэнтрам культуры (Białostocki Ośrodеk Kultury) і Нацыянальным цэнтрам культуры (Narodowе Centrum Kultury) пры падтрыманні парталу kulturadostepna.pl  Копрадусарам відовішча з’яўляецца польскі Нацыянальны інстытут аўдыёвізуальны NINA.

Імпрэза ладзіцца ў трох найбуйнейшых гарадах усходняй Польшчы – Жэшаве, Любліне ды Беластоку, – супольна з артыстамі, музыкантамі і мастакамі з краінаў Усходняга партнёрства – Арменіі, Азербайджану, Беларусі, Грузіі, Малдовы ды Украіны.

Традыцыйная рыса ўсіх імпрэзаў – адсутнасць квіткоў: уваход на кінасеансы, спектаклі і канцэрты бясплатны.

ДД, belsat.eu

Глядзі таксама
Каментары