«Нам няма куды разварочвацца»: перспектыва стварэння расейскай базы ў Беларусі набліжаецца да рэалізацыі


Перспектыва стварэння расейскай базы ў Беларусі набліжаецца да рэалізацыі. Уладзімір Пуцін даручыў ураду падпісаць пагадненне аб стварэнні вайсковага аб’екту на тэрыторыі нашай краіны.

Перад тым, як падпісаць адпаведнае пагадненне, міністэрствы абароны і замежных справаў Расеі мусяць правесці перамовы з афіцыйным Менскам. Але ў адмыслоўцаў не ўзнікае сумневаў, што дакумент урэшце падпішуць.

ПАВАЛ СЕВЯРЫНЕЦ, БЕЛАРУСКАЯ ХРЫСЦІЯНСКАЯ ДЭМАКРАТЫЯ:
«Лукашэнка можа выкручвацца адносна часу ўступлення гэтага пагаднення, адносна дэталяў дагляду або правозу нейкіх матэрыялаў, перакідкі войскаў. Але прынцыпова – гэта кропка апоры, якая дазволіць у выпадку чаго і яго дзёрнуць да нагі. Яна будзе. На жаль, яна будзе».

Напярэдадні кіраўнікі краінаў публічна абмяняліся рытуальнымі заявамі падчас Другога форуму рэгіёнаў Беларусі і Расеі. Лукашэнка запэўніў, што ня здрадзіў усходняму суседу з Захадам.

АЛЯКСАНДР ЛУКАШЭНКА:
«Не трэба нас папракаць, што мы кудысьці разварочваемся. Нам няма куды разварочвацца. Мы былі заўсёды разам і будзем яшчэ доўга разам».

А Пуцін запэўніў партнёра ў палітычным падтрыманні. «Упэўнены, што гэтыя выбары пройдуць на самым высокім узроўні: у адпаведнасці з нашымі, беларускімі, міжнароднымі стандартамі. Я хачу пажадаць вам поспехаў», – заявіў кіраўнік Расеі.

Пра што гутарылі кіраўнікі краінаў за кадрам, застаецца здагадвацца, але менавіта пасля гэтай сустрэчы і з’явілася паведамленне пра рашэнне гаспадара Крамля наконт стварэння базы ў Сінявокай.

ПАВАЛ СЕВЯРЫНЕЦ, БЕЛАРУСКАЯ ХРЫСЦІЯНСКАЯ ДЭМАКРАТЫЯ:
«За 20 гадоў абдымкаў з Расеяй Лукашэнка даў Пуціну столькі рычагоў уплыву, што канкрэтна сказаць, які канкрэтна з гэтых рычагоў быў ужыты ў Сочы, сказаць немагчыма. Але ў прынцыпе сітуацыя вельмі кепская, і Беларусь можа ціхай сапай страціць рэшткі незалежнасці».

Пакуль дакладнае месца размяшчэння расейскай авіябазы ў Беларусі не вядомае. Называліся такія гарады, як Бабруйск, Баранавічы ды Ліда. Пагадненне аб дыслакацыі вайсковага аб’екту будзе дзеяць 15 гадоў, пасля чаго аўтаматычна можа працягвацца кожнае пяцігоддзе.

Віталь Бабін, «Белсат»

Глядзі таксама
Каментары