«Нафтагаз Украіны» звярнуўся ў Стакгольмскі арбітраж з патрабаваннем перагляду кантракту з «Газпромам» на транзіт расейскага газу.
Пра гэта заявіў прадстаўнік украінскай кампаніі Юрый Вітрэнка. «Нафтагаз» патрабуе прывядзення кантракта ў адпаведнасць з трэцім энергапакетам Еўразвязу. У кампаніі лічаць неабходным дапасаванне сістэмы тарыфаўтварэння на транзіт да еўрапейскіх нормаў.
Паводле Вітрэнкі, у працэдуры ўсталявання тарыфаў на транзіт газу, холдынг прапануе адштурхоўвацца ад новых нарматыўных актаў, якія прыняў урад Украіны цягам апошніх месяцаў. Што прывядзе да павелічэння выдаткаў «Газпрому».
У пазове таксама ўтрымліваецца патрабаванне спагнаць з расейскай кампаніі недаплачаныя, паводле ацэнак Украіны $ 6 млрд.
У сваю чаргу, расейская манаполія патрабуе ад «Нафтагазу» пагасіць запазычанасць у $ 4,4 млрд. за газ пастаўлены Украіне ў першым паўгоддзі 2014-га.
ЮВ, interfax.ru