Аляксандр Барсукоў, які ўзначальваў ГУУС Менскага гарвыканкаму, прызначаны намеснікам міністра ўнутраных спраў. Адпаведны ўказ падпісаў 10 лістапада Аляксандр Лукашэнка.
Акрамя таго, Лукашэнка адправіў у адстаўку двух намеснікаў міністраў унутраных спраў.
Віктара Дубаўца вызвалілі ад пасады намесніка міністра ўнутраных спраў – начальніка Дэпартамента фінансаў і тылу са звальненнем са службы ў органах унутраных спраў у запас у сувязі з правядзеннем арганізацыйна-штатных мерапрыемстваў. Ён прызначаны начальнікам Дэпартамента фінансаў і тылу МУС (не намеснікам міністра).
Лукашэнка таксама вызваліў Аляксандра Кобрусева ад пасады намесніка міністра ўнутраных спраў па ідэалагічнай працы і кадравым забеспячэнні са звальненнем са службы ў органах унутраных спраў у запас у сувязі з правядзеннем арганізацыйна-штатных мерапрыемстваў, паведамляе БелТА.
Аляксандр Барсукоў нарадзіўся 29 красавіка 1965 года. Працаваў следчым у Хойніцкім і Веткаўскім РАУС, у менскім АМАПе, займаў кіруючыя пасады ў Цэнтральным РУУС Менску, ГУУС Менгарвыканкаму, УУС Меншчыны і МУС.
Адзначым, што Аляксандр Барсукоў неаднаразова асабіста каардынаваў разгоны акцыяў пратэсту ў Менску. Пасля жорсткага разгону дэманстрацыі 19 снежня 2010 года Барсукоў заяўляў, што падчас гэтых падзей пацярпела ў дзясяткі больш міліцыянтаў, чым дэманстрантаў.
ІІ, belsat.eu