На каталіцкім фэсце ў Будславе двух чалавек затрымалі за майкі з надпісамі «Беларусь»


Асобы ў цывільным затрымалі на Будслаўскім фэсце двух удзельнікаў у саколках з нацыянальнай сімволікай.

Пра гэта паведаміў «Нашай Ніве» прадстаўнік Беларускай хрысціянскай дэмакратыі Павал Пракаповіч.

Удзельнікі – імаверна, гэта былі бацька і сын – былі затрыманыя людзьмі ў цывільным з рацыямі і адпраўленыя ў пастарунак міліцыі. Там палкоўнік міліцыі Юрый Жалубоўскі, намеснік начальніка аддзелу ўнутраных спраў Мядзельскага райвыканкаму правёў з затрыманымі гутарку, падчас якой было заяўлена, што «не трэба пераўтвараць рэлігійнае мерапрыемства ў палітычнае», распавёў Павал Пракаповіч, які быў сведкам здарэння.

Затрыманыя мелі на саколках надпісы па-беларуску «Беларусь» і па-англійску «Belarus».

Пад канвоем амапаўцаў вернікаў вывелі за тэрыторыю фэсту да іх аўтамабіля.

Прадстаўнікі ўладаў не пыталіся меркавання арганізатараў Будслаўскага фэсту, ці бачаць яны ў патрыятычнай сімволіцы «палітыку».

Свята Маці Божай Будслаўскай у гэтым годзе наведалі больш за 10 тысяч чалавек, у тым ліку 3000 пешых пілігрымаў.

Вялікая частка ўдзельнікаў, збольшага моладзь, была апранутая ў дзень свята ў вышытыя беларускія кашулі і іншую вопратку з нацыянальным арнаментам і сімволікай.

Урачыстасці ў гонар абраза Маці Божай Будслаўскай праходзяць сёлета 3-4 ліпеня.

Паводле nn.by

Глядзі таксама
Каментары