На Гарадзеншчыне ў аварыі загінуў 2-ухгадовы хлопчык. Ягоныя пʼяныя бацькі не пацярпелі


П'яны кіроўца не ўпісаўся ў паварот і з'ехаў з дарогі.

Малы ехаў у машыне, дзе не было дзіцячага фатэлю.

«Каля вёскі Канвелішкі Воранаўскага раёну 15 красавіка а дзясятай увечары на прамым участку дарогі з сухім асфальтабетонным пакрыццём дваццацігадовы бацька дзіцяці дапусціў зʼезд «Аўдзі» ў правы кювет», – распавялі агенцтву «Інтэрфакс» у ДАІ Гарадзенскай вобласці.

Двухгадовы хлопчык ехаў на руках у сядзела ззаду мамы. Ні пʼяны кіроўца, ні ягоная такая самая жонка, ні трэці пасажыр раненняў не атрымалі. Затое дзіця праз гадзіну пасля аварыі памерла ў рэанімацыйным аддзяленні больніцы.

У крыві кіроўцы было 3 праміле.

У дачыненні да зняволенага пад варту кіроўцы ўзбуджаная крымінальная справа.

ДАІ нагадвае, што з сярэдзіны студзеня мінулага года перавозка дзяцей у аўтамабілях з выкарыстаннем спецыяльных фатэляў зʼяўляецца безумоўным абавязкам любога кіроўцы з дзіцём у салоне.

ДД, belsat.eu

Глядзі таксама
Каментары