Мянчук хоча стаць дэпутатам, каб абараніць правы жанчын і легалізаваць каноплі


stefanovic

Павел Стэфановіч мае намер прайсці ў беларускі парламент, каб вырашыць дзве праблемы беларускага грамадства.

26-гадовы менчук хоча ўзяць ўдзел у парламенцкіх выбарах, якія прызначаныя на 11 верасня, і стаць дэпутатам Палаты прадстаўнікоў па 98-й Паўднёва-Заходняй акрузе Менску, каб вырашыць «дзве вельмі важныя праблемы беларускага грамадства» — сямейнага гвалту і легалізацыі канопляў.

«Кожная чацвёртая беларуская жанчына падвяргаецца фізічнаму гвалту ў сям’і. Пры гэтым цяперашняя ўлада больш за 10 гадоў перашкаджае барацьбе з гэтай праблемай – піша Стэфановіч на сваёй старонцы «ўКантакце», дзе заклікае уступаць у ягоную ініцыятыўную групу.

«У нашай жа каманды ёсць праект закону па барацьбе з хатнім гвалтам. Як дэпутат я буду абараняць правы жанчынаў і спрыяць дасягненню гендэрнай роўнасці», – заяўляе мужчына.

На думку Стэфановіча, другая важная праблема Беларусі – поўная забарона марыхуаны, вынікам чаго сталі агромныя тэрміны турэмнага зняволення для тых, хто яе ўжывае, а таксама шырокі распаўсюд у краіне спайсу, сінтэтычнага наркотыка, «які разбурае цела чалавека і ягоную асобу».

«Ужыванне канопляў – не злачынства», – лічыць Стэфановіч.

«Няма ніякіх прычынаў, каб саджаць за іх людзей. Я буду судзейнічаць легалізацыі канопляў, каб яна прадавалася ў аптэцы», – заявіў ён.

Марыхуана – легальны ў той ці іншай ступені сродак у Вялікай Брытаніі, Нямеччыне, Іспаніі, Партугаліі ды Чэхіі. У гэтых краінах каноплі актыўна выкарыстоўваюцца ў медыцыне як сродак супраць болю. Патрабаванні па легалізацыі марыхуаны гучаць у Польшчы.

ДД, belsat.eu

Глядзі таксама
Каментары