Мядзельскія даішнікі забралі ў хлопца мапед, а той падпаліў гараж з міліцэйскімі машынамі


Ілюстратыўнае фота

У Мядзеле скончылася расследаванне крымінальнай справы аб падпале міліцэйскай машыны «Лада Прыёра» у гаражы аддзялення міліцыі пасёлка Нарач. Следчыя перадалі справу пракурору Мядзельскага раёна для накіравання ў суд.

Пракурор Іван Малафей распавёў kraj.by, што ў здзяйсненні злачынства абвінавачваецца 22-гадовы жыхар курортнага пасёлка Нарач. Напярэдадні супрацоўнікі ДАІ забралі ў яго мапед «Дэльта».

Уначы 5 кастрычніка 2017 года малады чалавек залез у службовы гараж аддзялення міліцыі, каменем збіўшы навясны замок у дзвярах.

У гаражы стаялі дзве міліцэйскія машыны «Лада Прыёра» і мапед абвінавачанага. Паводле папярэдняй версіі следства, хлопец зліў бензін з мапеда, абліў ім правае пярэдняе кола адной з машын і падпаліў яго.

Машына загарэлася. Агонь перакінуўся на другі аўтамабіль, а таксама на дах гаража.

У выніку пажару «Лада», якую падпаліў зламыснік, згарэла цалкам. Разам з ёй згарэлі сігнальная гукаўзмацняльная ўстаноўка, радыёстанцыя, аварыйны дарожны знак, аўтамабільная аптэчка і 17 літраў бензіну. Другі аўтамабіль пашкоджаны часткова. Агонь таксама зачапіў дах гаража.

Агульная шкода, прычыненая мядзельскай міліцыі, ацэньваецца ў 9 833 рублі 29 капеек, што з’яўляецца буйным памерам.

Крымінальная справа была заведзеная і расследавалася па другой частцы артыкула 218 Крымінальнага кодэкса Рэспублікі Беларусь «Наўмыснае знішчэнне або пашкоджанне маёмасці, здзейсненае агульнанебяспечным спосабам, што пацягнула прычыненне шкоды ў буйным памеры».

Злачынства караецца абмежаваннем волі да пяці гадоў або пазбаўленнем волі ад трох да дзесяці гадоў.

КА, belsat.eu

Глядзі таксама
Каментары