Лідар крымскіх татараў Мустафа Джэмілеў заявіў, што Крэмль прымусова змяняе дэмаграфічны склад на тэрыторыі Крыму – яны завозяць расейскіх перасяленцаў, каб выціснуць мясцовае насельніцтва.
«Прымусовае змяненне дэмаграфічнага складу на акупаванай тэрыторыі, згодна з Жэнеўскай канвенцыі 1949 года, ставіцца да разраду ваенных злачынстваў. Таму дадзеныя, колькі яны завезлі, старанна хаваюцца. У прэсе было паведамленне пра тое, што на тэрыторыі Крыму знаходзіцца 250 тыс. расейскамоўных людзей, прывезеных з Луганскай і Данецкай абласцей. Акрамя таго, яшчэ ў 2014 годзе паведамлялі пра 15 тыс. офісных работнікаў, якіх яны прывезлі. Але, па розных ацэнках, на тэрыторыю Крыму завезена каля паўмільёна расейцаў. Разам з тым, нашыя суайчыннікі, якія прыязджалі з Крыму, кажуць пра тое, што ў рэчаіснасці іх больш. Мяркуецца, што гаворка ідзе пра 850 тыс. і да мільёна перасяленцаў», – заявіў Джэмілеў у інтэрв’ю «Укрінфарму».
Джэмілеў прывёў і іншыя лічбы: цяпер у Крыме назіраецца высокая смяротнасць – смяротнасць перавышае нараджальнасць на 33%.
«У Расеі сцвярджаюць, што колькасць насельніцтва акупаванага Крыму павялічылася на 10%. Прымаючы гэта пад увагу, а таксама высокую смяротнасць, тыя лічбы, якія я называў, прыблізна адпавядаюць рэчаіснасці. Яны (расейская ўлада – рэд.) завозяць у Крым (людзей з іншых рэгіёнаў – рэд.) У вялікай колькасці. Але гэта хаваецца як ваенная таямніца, таму што яны выдатна разумеюць, што гэта злачынства», – падкрэслівае ён.
Раней расейскія СМІ паведамлялі, што ў Крыме рэзка пагоршылася дэмаграфічная сітуацыя: за апошнія чатыры гады колькасць залішне памерлых у Крыме ў параўнанні з узроўнем 2013 года перавысіла 9,4 тыс. чалавек. Рост смяротнасці меў эпідэмічны характар па ўсёй тэрыторыі Крыма: у Феадосіі смяротнасць вырасла на 13%, Сімферопалі – 12%, Еўпаторыі – 6%, Ялце – 5%. Пры гэтым з 2005 па 2013 год смяротнасць ва ўкраінскім Крыме бесперапынна зніжалася.
ІІ, belsat.eu
