Кіраўніцтва заводу «Белалка» не бачыць нічога ганебнага, у тым, каб ездзіць у акупаваным Крым і супрацоўнічаць з арганізацыямі, супраць якіх дзейнічае еўрапейскія ды ўкраінскія санкцыі. Але пры гэтым працягвае пастаўляць сваю прадукцыю ў ЕЗ і Украіну.
«Што ж, ялцінскі «Залаты Грыфон» завяршыўся, і мы маем на чатыры падставы для гонару больш, чым да яго пачатку. Тры залатыя медалі і адзін гран-пры», – піша «Белалка» на сваіх старонках у сацыяльных сетках.
Прадстаўнікі заводу ўдзельнічалі ў 38-м міжнародным конкурсе алкагольнай прадукцыі «Залаты грыфон». Яго з 29 ліпеня па 5 жніўня ладзіў у Ялце ўсерасейскі нацыянальны навукова-даследчы інстытут вінаградарства і вінаробства «Магарач» расейскай акадэміі навук і Саюз вінаробаў Крыму. Гэта традыцыйны конкурс, які праводзіцца больш за 30 гадоў запар. Да анексіі Крыму арганізатарам быў украінскі бок – Нацыянальны інстытут вінаграду і віна «Магарач». Пасля захопу паўвыспы гэтую ўстанову перайменавалі, а конкурс цяпер праходзіць пад расейскім сцягам.
У 2012 годзе на «Залатой Грыфон» ва ўкраінскую Ялту прыязджалі прадстаўнікі дзевяці краінаў, у тым ліку Чэхіі, Малдовы, Францыі. Пасля анексіі і ўвядзення санкцыяў сітуацыя змянілася – цяпер у конкурсе бяруць удзел прадстаўнікі з Казахстану, Туркменістану і непрызнанай Абхазіі. А разам з імі – прадстаўнікі Беларусі. Пасля акупацыі Крыму завод «Белалка» быў пастаянным удзельнікам конкурсу і нават не хаваў гэтага.
Мы выкарысталі ўсе магчымыя спробы атрымаць у прадстаўнікоў «Белалка» каментар, але не пачулі нават адмоўнага адказу, толькі поўнае ігнараванне. Таксама прадпрыемства паступае з каментарамі карыстальнікаў у сваіх сацыяльных сетках. Не было адказу і на пытанне: якім чынам супрацоўнікі кампаніі апынуліся ў Крыме. Трапіць на паўвыспу легальна і з тэрыторыі Украіны вельмі складана. Другі шлях – праз Расею, што лічыцца парушэннем і за гэта можна панесці адказнасць. Грамадзяне, якія падарожнічаюць гэткім чынам, могуць апынуцца неўязнымі ва Украіну на тры гады і атрымаць штраф да 390 рублёў.
3 снежня 2013г года РВУП «Берасцейскі лікёра-гарэлачны завод» рэарганізаваны ў ААТ, а ў ліпені 2015 года згодна з Указам прэзідэнта №326 створаны беларускі алкагольны холдынг. У склад холдынгу ўваходзяць 8 арганізацыяў, у тым ліку і «Белалка». Са справаздачы холдынгу за 2017 годам вынікае, што найбольшы прыбытак прынесла пастаўка прадукцыі ў Расею, Латвію ды Украіну. Адпаведна, украінскі рынак вельмі важны і для «Белалка», але чамусьці прадпрыемства не баіцца яго страціць.
«Гэта даволі небяспечная гульня. Ёсць рызыка выклікаць на сябе абмежавальныя крокі з боку Украіны. «Белалка» можа страціць больш, чым атрымаць ад удзелу ў конкурсе. Выглядае, што ўдзел у конкурсе важны для іх хутчэй па ідэалагічных, чым эканамічных прычынах». – кажа палітолаг Алесь Лагвінец.
«Калі ўкраінскія СМІ звернуць увагу на гэтую гісторыю, то экспарт можа пацярпець. Бізнес не любіць скандалы. Імпарцёры могуць адмовіцца ад пастаўшчыка з дрэннай рэпутацыяй. З боку Украіны могуць быць выкарыстаныя іншыя санкцыі да прадстаўнікоў «Белалка», якія ездзілі ў Крым. Да прыкладу, ім могуць забараніць уезд ва Украіну». – лічыць валанцёр кампаніі дапамогі пацярпелым ад вайны ва Украіне Андрэй Стрыжак.
Тым часам, беларускія гандлёвыя сеткі прадаюць фактычна скрадзеныя ва Украіны віна. Летась гэтым адзначылася гандлёвая сетка «Алмі» . Кампанія не дала ніякіх адказаў на запыты, але спачатку прыбрала расейскі сцяг з вітрыны, а потым і ўласна віно з Крыму. Сёлета крымскім віном з надпісам на цэнніку «Крым, Расея», у тым ліку вырабленым да 2014 года, гандлюе «Карона».
СА, belsat.eu