Жыхароў украінскага Львова перасаджваюць на аўтобусы МАЗ.
Першыя аўтобусы даставілі ў канцы жніўня. Да канца года ва ўкраінскім горадзе мае быць 100 МАЗаў, таксама Львоў абновіць аўтапарк 50 аўтобусамі мясцовага прадпрыемства «Електротранс».
Беларускія аўтобусы набывалі ў лізінг. Яны маюць нямецкае камплектаванне ды электроннае табло, але не абсталяваныя кандыцыянерамі. Кошт аднаго аўтобуса – 122 тыс. еўраў (разам з мытам).
Намеснік кіраўніка жыллёвай гаспадаркі ды інфраструктуры Львоўскай гарадской рады Андрэй Білы распавёў, што спачатку прыглядаліся да турэцкіх аўтобусаў, аднак у выніку аддалі перавагу беларускім.
«Я разумею, магчыма, для ўраду Беларусі было прынцыпова ўвайсці ў Львоў, і, напэўна, вялікую частку яны ўзялі на сябе. Дэмпінгуючы, па-сутнасці, урад Беларусі фінансаваў развіццё грамадскага транспарту ў Львове», – адзначыў Андрэй Білы.
НМ, belsat.eu, паводле прэс-службы Львоўскай гарадской рады