«Маўклівыя кнігі» з выявамі расстраляных у 37-м годзе пісьменнікаў выдадуць у Беларусі

У межах праекту «(Не) расстраляная паэзія», які ладзіць партал TuzinFM.by, пабачыць свет серыя з 12 «маўклівых кнігаў» з выявамі і цытатамі беларускіх пісьменнікаў, якія былі расстраляныя ў 1937 годзе.

Як паведамляе TuzinFM, «Маўклівыя кнігі» – гэта дызайнерскія нататнікі, якія распрацавала Кацярына Пікірэня. «Галоўная ідэя «маўклівых кнігаў» – даць адчуць пераемнасць, сувязь пакаленняў, тое, што мы можам падхапіць нявыказаныя і ненапісаныя словы тых, чый творчы палёт абарвалі», – кажа Кацярына.

Да выдання ўжо гатовая серыя з 12 «маўклівых кнігаў». На кожнай з іх будзе імя, стылізаваны партрэт расстралянага творцы, цытата з ягонага твору, а ў сярэдзіне, сярод чыстых старонак – песеннік, тэксты ўсіх кампазіцый, якія цяпер ствараюць музыкі ў межах праекту «(Не) расстраляная паэзія».

Нататнікі будуць надрукаваныя абмежаваным накладам. Найперш іх атрымаюць тыя, хто падтрымае праект «(Не) расстраляная паэзія» на Talaka.by.