Лукашэнка запатрабаваў, каб у клінічным медцэнтры, які будуецца ў вёсцы Ждановічы Менскага раёна, абслугоўваліся як дзяржаўныя служачыя, так і звычайныя грамадзяне.
Ён дадаў, што ў грамадстве горача абмяркоўваецца будаўніцтва пад Менскам клінічнага медычнага цэнтра.
«Я падкрэсліваю: па абслугоўванні нашага насельніцтва, не толькі, як пішуць або разважаюць, чыноўнікаў ці дзяржаўных служачых, хоць не без гэтага», – перадае яго словы БелТА.
Лукашэнка распавёў, як прымалася рашэнне аб будаўніцтве гэтай установы.
«Як мне даклалі яшчэ ранейшыя кіраўнікі Менскага гарвыканкама, планавалася ў Менску будаўніцтва вялізарнага шпіталю з-за недахопу плошчаў. Кошт яго вагаўся ад 300 да 500 млн еўра ў залежнасці ад абсталявання. Вядома, такіх грошай у дзяржаве сёння няма. Танней ён абыйсціся і не мог, таму што хлеў будаваць сёння не толькі ў Мінску, але і ў іншым горадзе непрымальна. Скупы плаціць двойчы », – сказаў ён.
Тады, паводле слоў Лукашэнкі, было прынята рашэнне перадаць ва ўласнасць Менску Рэспубліканскі клінічны медычны цэнтр, у якім усяго абслугоўваецца больш за 17 тыс. чалавек, у тым ліку каля 6 тыс. дзяржслужачых, і ўзвесці новы невялікі, але сучасны медцэнтр.
«Мы, пабудаваўшы кампактны, невялікі цэнтр, зэканомілі каля 400 млн еўра. Вось і ўся канспіралогія гэтага пытання.
Мною было прынята рашэнне пабудаваць меншы шпіталь, а гэты вялізарны перадаць гораду з усім абсталяваннем, персаналам (у асноўным ён там застануся). Не схаваю: была пастаўлена задача на базе гэтага цэнтра стварыць суперсучасны шпіталь, дзе будуць адпрацоўвацца найноўшыя тэхналогіі. Абслугоўвацца там будзе 3-4 тыс. дзяржслужачых, астатнія – звычайныя грамадзяне, з савецкіх часоў стаяць на ўліку людзі, якія заслужылі абслугоўвацца ў падобным цэнтры. Так ва ўсіх дзяржавах прынята », – распавёў Аляксандр Лукашэнка.
Кіраўнік дзяржавы адзначыў, што абслугоўвацца ў новым клінічным медцэнтры грамадзяне змогуць таксама на платнай аснове.
«Калі цябе не задавальняе абслугоўванне ў нейкі менскай лякарні, ты можаш прыйсці, заплаціць грошы (паколькі не па месцы будзеш абслугоўвацца) і абслугоўвацца тут. Што ў нас мала багатых людзей, якія сёння гатовы заплаціць і правесці нейкія даследаванні, каб усталяваць дакладны дыягназ? »
Лукашэнка асабліва падкрэсліў, што ніякіх схаваных крокаў пры будаўніцтве ўстановы аховы здароўя не было.
«Тыя, хто кажуць, што гэта мая лякарня – слава богу, каб я і далей так лячыўся, як лячуся да гэтага часу. Я па лякарнях не хадзіў і не хаджу», – заявіў ён.
Паводле слоў Лукашэнкі, падобныя медцэнтры плануецца адкрыць у кожнай вобласці.
Цяпер медцэнтр у Ждановічах дабудоўваецца – аб’ект плануюць здаць да канца бягучага года.
КА, belsat.eu
