Лукашэнка: дэкрэт аб «дармаедах» адмяняць не буду, але цягам года збор можаце не плаціць. Абнаўляецца

urgent

Скандальны дэкрэт аб «дармаедах» паставілі на паўзу, паведамляе belta.by. Адпаведнае рашэнне было прынятае 9 сакавіка на нарадзе па актуальных пытаннях развіцця краіны з удзелам кіраўніка Беларусі.

«Цягам сакавіка, калі трэба, нам трэба падкарэктаваць гэты дэкрэт. Але дэкрэт адмяняцца не будзе. Перадайце перш за ўсё чыноўнікам, што ён будзе выконвацца з тымі карэктыроўкамі, пра якія я сказаў», – заявіў Аляксандр Лукашэнка.

«Я, натуральна, назіраю, наколькі гэта магчыма, і адсочваю гэтую пісаніну ў медыях – і апазіцыйных, і праўладных. І ведаю заявы прадстаўнікоў пятай калоны і яшчэ некаторыя рэчы, чаго грамадства не ведае. Хоць намёк у медыях на гэта быў», – заявіў Лукашэнка.

Лукашэнка даручыў да 1 красавіка скласці новы спісы тых, хто павінен заплаціць падатак на «дармаедства». «Спісы павінны быць вывераныя. Прыцягнуць трэба ўсіх – дэпутатаў мясцовых Саветаў, міліцыю, участковых, спецслужбы – усіх прыцягнуць, але скласці гэтыя спісы. Яны павінны быць у кожнага старшыні гар і райвыканкама, кіраўнікоў адміністрацыяў у абласных цэнтрах і горадзе Менску. А Адміністрацыя прэзідэнта разам з урадам павінна арганізаваць кантроль за выкананнем гэтага рашэння. І не дай Бог вы пакрыўдзіце хоць аднаго чалавека», – раздаваў указанні Лукашэнка.

Тыя, хто ўжо заплаціў падатак, або будуць вызваленыя ад яго аплаты за 2017 год, або атрымаюць назад свае грошы, піша дзяржаўнае інфармацыйнае агенцтва belta.by.

ЮВ, belsat.eu, паводле belta.by

Тэгі: 
Глядзі таксама
Каментары