«Даніэла» сышла, але на яе месца прыйдзе новая стыхія з поўдня. Праз пару дзён зноў пахаладае, будуць снегапады і вецер.
Паводле начальніка службы гідраметэаралагічных прагнозаў Белгідрамету Дзмітрыя Рабава, у бліжэйшыя два дні чакаецца «ціхае, спакойнае, але больш халоднае надвор’е».
Сёння ўначы будзе снегапад, удзень месцамі невялікі кароткачасовы снег. У асобных раёнах будзе слабая завіруха, па паўднёвым усходзе месцамі захаваецца слабы галалёд. На асобных участках дарог галалёдзіца. Тэмпература паветра ўначы складзе мінус 4-11, удзень будзе 3-9 градусаў марозу.
У пятніцу ўначы падобная тэмпература – мінус 9-16 градусаў, удзень мінус 6-13.
У суботу надвор’е вызначыць паўднёвы цыклон, які прыйдзе з Украіны і будзе ссоўвацца праз паўднёва-ўсходнія раёны краіны далей на Расею.
Надвор’е пагоршыцца: на большай частцы тэрыторыі Беларусі пройдзе снег і мокры снег. Месцамі будзе завіруха, па паўднёва-ўсходняй палове моцны снег, мокры снег, галалёд.
Удзень у асобных раёнах узмацніцца вецер парывамі да 15-18 метраў за секунду. Тэмпература ўначы мінус 8-15 градусаў, па паўночным захадзе пры праясненнях мінус 16-18 градусаў, па поўдні мінус 2-7, удзень ад нуля па паўднёвым усходзе да мінус 13 па паўночным захадзе.
ДР, belsat.eu