Казахстан падставіў хаўруснікаў. Што чакае Беларусь?

video

https://youtu.be/VdTYseb2cQY

Казахстан ужо паўнапраўны сябра Сусветнай гандлёвай арганізацыі. Ад сёння гэты статус пачаў дзеяць юрыдычна, пра што абвесціў кіраўнік краіны Нурсултан Назарбаеў.

Такім чынам Беларусь засталася адзінаю ў Еўразійскім саюзе, якая дзейнічае па-за сусветным гандлёвым правам.

«Усяго менш як за чвэрць стагоддзя Казахстан склаўся як суверэнная нацыянальная гаспадарка, улучаная ў глабальную гаспадарчую сувязь як дзяржава, што сталася паўнавартасным удзельнікам сусветнай сям’і нацыяў» – кажа прэзідэнт Казахстану Нурсултан Назарбаеў.

Перамовы пра ўступленне Казахстану ў СГА вяліся цягам амаль дваццаці гадоў. Пра далучэнне Астаны стала вядома яшчэ ў ліпені гэтага года, калі бакі падпісалі адпаведны пратакол. Для атрымання паўнапраўнага статусу Казахстан меўся прывесці сваю тарыфную і мытную палітыку ў адпаведнасць з нормамі арганізацыі, што неаднойчы выклікала нервовую рэакцыю з боку афіцыйнага Менску.

«Мы вымушаныя прыстасавацца да таго, што там навараціў з СГА Казахстан. І гэта будзе няпроста, бо там панізілі мыты так, што можа хлынуць прадукцыя на расейскі ды беларускі рынак» – распавядае Аляксандр Лукашэнка, кіраўнік Беларусі.

Галоўная небяспека крыецца ў тым, што Казахстан мяжуе з Кітаем. А таму патэнцыйна ён брама, праз якую кітайскія тавары запоўняць беларускі рынак. Пацярпець праз гэта можа і Расея, якая сама сябра СГА з 2012-га года, але на іншых умовах.

«Калі ёсць мяжа – гэта не так складана: на мяжы ўводзяцца бар’еры і ўсё ў парадку. Але ўмова Мытнага саюзу – адсутнасць унутраных мытных межаў» – тлумачыць Уладзімір Арцюгін, часопіс «Валютное регулирование и ВЭД».

Удзел Казахстану ў СГА ставіць пад пытанне і дзейнасць Еўразійскага эканамічнага саюзу ў цэлым. Краінам ЕАЭС будзе больш выгодна гандляваць не паміж сабою, а з іншымі краінамі, што прывядзе да падзення аб’ёмаў гандлю ўнутры саюзу, мяркуюць аналітыкі.

Што да ўдзелу Беларусі ў Сусветнай гандлёвай арганізацыі, то, паводле Лукашэнкі, няўдзел у ёй можа быць больш карысны, чым далучэнне. З такою, зрэшты, ацэнкаю згодны і эканаміст Леў Марголін.

«Уступленне ў сусветную гандлёвую арганізацыю накладае на краіну дастаткова жорсткія ўмовы» – упэўнены Леў Марголін.

Якія моцна абмяжуюць урад Беларусі, які, як вядома, не цураецца «шэрых» схемаў і часта шукае выгадаў ад палітычных канфліктаў сваіх партнёраў.

Вольга Жарнасек, Belsat.eu

Глядзі таксама
Каментары