Журналісту-фрылансеру з Гомля прысудзілі чарговы штраф.
Такое рашэнне 20 студзеня прыняў суд Кармянскага раёну Гомельскай вобласці (суддзя Андрэй Аўсейцаў).
Пра суд Кастусь Жукоўскі разам з калегам Аркадзем Малышам даведаліся з смс-паведамленняў. Як высветлілася, апошняга выклікалі як сведку.
22 снежня 2015 года абодвух незалежных журналістаў затрымлівалі ў райцэнтры Карма супрацоўнікі міліцыі. Журналісты рыхтавалі відэасюжэт пра праблемы з водазабеспячэннем Кармянскага раёну.
Пасля для складання пратакола Кастуся Жукоўскага выклікалі ў Кармянскі РАУС, у той час як Аркадзя Малыша – адразу ў суд.
Жукоўскага звінавацілі ў парушэнні арт.22.9 КаАП («у працы без акрэдытацыі»).
Такім чынам, гэта трэці прысуд незалежным журналістам у гэтым годзе.
14 студзеня Калінкавіцкі раённы суд аштрафаваў Кастуся Жукоўскага на 35 базавых (7 млн 350 тыс. рублёў) за парушэнне арт.22.9 КаАП.
13 студзеня паводле таго ж артыкула суд Гомельскага раёну прысудзіў журналістцы Ларысе Шчыраковай штраф у памеры 22 базавыя велічыні (4 млн 620 тыс. рублёў).
