Каманда МАЗу на Дакары ехала без лабавога шкла


Сярод асноўных канкурэнтаў «МАЗу» – «Iveco», «КамАЗ», «MAN», «Renault» і «Tatra».

Падчас першага этапу гонкі, якая стартавала ў Парагваі, беларускі цяжкавік Сяргея Вязовіча пашкодзіў ветравое шкло гэтак, што спартоўцы вырашылі яго проста выціснуць.

2 студзеня ў парагвайскай сталіцы Асуньсён стартавала штогадовае ралі на матацыклах, легкавых и грузавых аўтамабілях, а таксама квадрацыклах.

Ужо ў шосты раз удзел у гонцы бярэ Менскі аўтазавод.

  • «Дакар» – гэта легендарная гонка «Парыж–Дакар», што праводзіцца з 1978 года. Звычайна яна пачыналася ў сталіцы Францыі і заканчвалася ў сталіцы Сенегала, але ў 2009-м праз пагрозу тэрактаў марафон на нявызначаны час перанеслі ў Паўднёвую Амерыку.

Сёлета «МАЗ» прадстаўляюць тры каманды: пілота Сяргея Вязовіча, штурмана Паўла Гараніна і механіка Андрэея Жыгуліна (511-ы нумар), Аляксандра Васілеўскага, Дзмітрыя Віхрэнкі і Антона Запарошчанкі (нумар 522), Аляксея Вішнеўскага, Максіма Новікава і Аляксея Невяровіча (нумар 533).

Падчас першага дня гонкі экіпаж 511 на самым пачатку трасы пашкодзіў ветравое шкло галінай дрэва і практычна страціў бачнасць дарогі. Спартоўцам давялося выціснуць шкло і паехаць без яго.

У выніку беларусы фінішавалі на 12-м месцы, адстаючы ад лідара на 1 хвіліну і 33 секунды. Экіпаж 522 пасля першага дня – на 21-м месцы, 533 – на 23-м.

У Паўднёвай Амерыцы цяпер лета, тэмпература паветра ў Асуньсьёне ўдзень – каля 35 градусаў.

У класе грузавікоў у ралі прымаюць удзел 50 экіпажаў. Сярод асноўных канкурэнтаў беларусаў – расейскі «КамАЗ», італьянскае «Iveco», нямецкі «MAN», французскае «Renault» і чэшская «Tatra».

На «Дакар» беларусы прывезлі два абноўленых спорткары «МАЗ». Гоначныя цяжкавікі маюць 12,5-літровыя рухавікі магутнасцю 930 л. с., створаныя чэшскай кампаніяй «Buggyra». Канструкцыя грузавіка стала надзейней, а ў салоне з’явіўся кандыцыянер. У аўтамабілі таксама ўбудаваная сістэма круіз-кантролю.

Гонка «Дакар-2017» пройдзе па тэрыторыі трох краінаў.

У каманды Аляксандра Васілеўскага цяжкавік папярэдняй генерацыі – з рухавіком вытворчасці Тутаеўскага маторнага заводу.

  • Падзел на тры катэгорыі ўдзельнікаў (матацыклы, аўтамабілі і грузавікі) адбыўся ў 1980-м, да гэтага часу гонка была агульнай, і перамаглі ў ёй звычайна матацыклісты).

Гонка пройдзе па горных перавалах і пясчаных выдмах на тэрыторыі трох краінаў – Парагваю, Аргентыны і Балівіі, і скончыцца 14 студзеня ў Буэнас-Айрэсе.

Глядзі таксама
Каментары