Прыхільнікі «Ісламскага дзяржавы» пагражаюць забіць аднаго з заснавальнікаў «Twitter’а» Джэка Дорcі. Яны матывуюць свой намер пастаянным блакаваннем іх акаўнтаў, паведамляе korrespondent.net са спасылкай на buzzfeed.com.
«Вашая віртуальная вайна стане сапраўднай вайной», – гаворыцца ў пасланні, адрасаваным заснавальніку «Twitter’а». Надпіс суправаджаецца фатаграфіяй Дорсі, на якой намаляваны прыцэл стрэльбы.
«Мы казалі вам з самага пачатку, што гэта не ваша вайна, але вы не зразумелі гэтага і працягвалі закрываць нашыя акаўнты на «Twitter’ы», аднак мы заўсёды вярталіся», – пішуць чальцы «Ісламскай дзяржавы».
Прадстаўнік «Twitter’а» Джым Просэр паведамляе, што аддзел бяспекі сацыяльнай сеткі сумесна з праваахоўнымі органамі ўжо расследуе дакладнасць гэтых пагрозаў.
«Twitter», як і відэахостынг «YouTube», як правіла, аператыўна рэагуе на відэа, на якіх прыхільнікі «Ісламскай дзяржавы» караюць закладнікаў. Сэрвісы выдаляюць такія пасты і блакуюць акаўнты, які публікуюць забароненую інфармацыю.
[vc_single_image image=”1″ img_size=”large”]
Карыстальніцкае пагадненне «Twitter’а» прадугледжвае, што сэрвіс мае права абмяжоўваць публікацыю пастоў, якія змяшчаюць адкрытыя пагрозы гвалту супраць іншых людзей. Таксама забаронена выкарыстоўваць сацсетку ў незаконных мэтах.
Дорсі з’яўляецца адным са стваральнікаў сэрвісу мікраблогаў «Twitter», які быў заснаваны ў 2006 годзе. Ён узначальваў кампанію да 2008 года. Пасля сыходу з «Twitter’а» Дорсі запусціў сэрвіс інтэрнэт-плацяжоў «Square».
Тэрарыстычная групоўка «Ісламская дзяржава» актывізавалася ў пачатку лета 2014 года і захапіла значную частку Сірыі і Іраку. 29 чэрвеня на падкантрольных тэрыторыях было абвешчана стварэнне халіфату.
МЯ, belsat.eu, паводле korrespondent.net
