Юнак спужаўся, калі ягонай знаёмай стала кепска. Цяпер яму пагражае да дзесяці гадоў турмы.
У ліпені ў міліцыю паступіла паведамленне з Менскай абласной клінічнай больніцы, у якую патрапіла 16-гадовая жыхарка Стаўбцоў з прыкметамі наркатычнай перадазіроўкі.
Міліцыянты выявілі, што дзяўчына паехала са сваім знаёмым у лес побач з вёскай Каралёў Стан, дзе знаходзіўся патайнік з псіхатропамі. Хлопец забраў адтуль «закладку», прыняў наркотык і намовіў дзяўчыну таксама прыняць яго. Пасля гэтага ёй стала кепска, а малады чалавек збег.
«Дзяўчыну ў неадэкватным стане знайшлі мясцовыя жыхары, якія перадалі яе медыкам. У шпіталі ёй паставілі дыягназ «перадазіроўка псіхатропнымі рэчывамі», – распавяла афіцыйная прадстаўнічка Менскага РУУС Алена Каралёва.
Міліцыя мяркуе, што хлопец схіліў знаёмую да ўжывання наркотыку, каб выклікаць у яе залежнасць і зрабіць яе кліентам дылера.
Супраць маладога чалавека распачалі крымінальную справу за «схіленне да ўжывання наркатычных сродкаў, псіхатропных рэчываў або іх аналагаў». Яму пагражае ад трох да дзесяці гадоў зняволення.
ДД