Моўніца Настасся Мацяш – пра тое, як працаваў кіраўнік нашае моўнае службы Зміцер Саўка, якога не стала роўна год таму.
Хацелася б прыгадаць яскравыя моманты, нетрывіяльныя сітуацыі ды выпадкі, якіх шмат назбіралася за гады знаёмства, супрацы і проста цёплых чалавечых дачыненняў са Змітром. Але выявілася, што і праз год пасля горкай весткі пра смерць Саўкі падзяліцца асабістымі ўспамінамі няпроста. То азначу лёгкім пункцірам, які, аднак, акрэслівае зусім не лёгкае, а грунтоўнае, глыбока асэнсаванае стаўленне да працы, у якой дробязяў, няважнага – не бывае.
Зміцер быў у Коўне на Кангрэсе беларусістаў, але ягоны скайп працягваў гарэць зялёным кружочкам. Чым мы з калегамі і карысталіся.
[19:22:01] Nastaśsia Maciaš: ДЭйвідас Падайґіс Deividas Padaigis літоўскі футбаліст
[19:22:40] Zmicier Sauka: узяў
[19:30:40] Zmicier Sauka: на Ай
[19:30:46] Nastaśsia Maciaš: дзякую
[19:31:55] Zmicier Sauka: хадзіў пытаць дзеўчыну на рэцэпцыю
Так. Для таго, каб прозвішча літоўскага футбаліста прагучала ў навінах з правільным націскам, Зміцер пайшоў шукаць носьбіта мовы. Журналісцкі матэрыял жыве ў тэлевізійным эфіры імгненне, але ўсё, што можна высветліць, трэба высветліць.
Аднойчы аніяк не магла вызначыць націску ў беларускім прозвішчы. Саўка ўзяў тэлефонны даведнік, знайшоў аднафамільца, пазваніў, патлумачыў прычыну звароту, разгаварыўся, усё высветліў.
У сучасным свеце – падыход блізу фантастычны.
У сучасным навінным свеце, які збольшага кіруецца прынцыпам «галоўнае – паспець», падыход блізу фантастычны. Для нас жа назаўсёды застанецца эталонным, узорным.
Настасся Мацяш
Іншыя ўспаміны: