Група інваліднасці за грамадзянскую пазіцыю? Гісторыя наваградскай актывісткі


Наваградская актывістка Таццяна Вайтовіч падала ў суд супраць медыкаў, што прызналі яе псіхічна хворай і непрацаздольнай.

Інцыдэнт з наваградскай фельдшаркай-лабаранткай, а таксама актывісткай партыі БХД Таццянай Вайтовіч адбыўся яшчэ восенню мінулага года. Таццяна распавяла, што 1 лістапада да яе ў кватэру прыйшлі міліцыянты і гвалтоўна адвезлі ў Гарадзенскую псіхіятрычную лякарню, дзе яна прабыла некалькі тыдняў.

Паводле слоў жанчыны, гэта адбылося праз яе асабісты канфлікт з мясцовымі ўладамі і праз актыўную грамадзянскую пазіцыю, што прыйшлася недаспадобы чыноўнікам. Яшчэ ў студзені 2017 года Таццяна атрымала заключэнне камісіі Гарадзенскага абласнога клінічнага цэнтру «Псіхіятрыя-неўралогія», у якім адзначаецца: па стане псіхічнага здароўя падставаў для пастаноўкі на дыспансэрнае назіранне няма. Аднак амаль праз год экспертная камісія рэзка змяніла меркаванне.

«У псіхлякарні мне выдалі мужчынскія майткі!»

Актывістка сцвярджае, што падчас прымусовай «дастаўкі» у псіхлякарню яе збілі і не дазволілі ўзяць з сабой неабходныя рэчы, у шпіталі яна вымушаная была прасіць дадатковую бялізну.

«Як яны са мной абыходзіліся! Я – цалкам здаровы чалавек, а яны мне даюць мужчынскія майткі! Вы ўяўляеце? Гэта ганьба рэспубліцы. І яшчэ мне кажуць: купіш новыя за 10 рублёў, жаночыя, нам прынясеш і аддасі! Прусакі па сценах бегаюць, я бачыла, што там за шпіталь. Гэта жудасна», – распавядае Таццяна Вайтовіч.

Таццяна Вайтовіч у зале суда

Са шпіталя яе адпусцілі 24 лістапада 2017 года, з медычным заключэннем – 2-я група інваліднасці. Таццяна з такім рашэннем медыкаў катэгарычна не пагаджаецца і мае намер абскарджваць яго ў судзе. 30 лістапада яна прайшла паўторнае абследаванне ў 10-й гарадской клінічнай больніцы г. Менску, якое не пацвердзіла дыягназ, пастаўлены гарадзенскімі спецыялістамі.

«Мне ж прыпісалі яшчэ і эпілепсію нейкую, якой у мяне не было. Але я ж сама медык. Неўралогія, эпілепсія і псіхіятрыя несумяшчальныя. Таму я хутка паехала і мяне абследавалі. Вынікі добрыя, але медыка-рэабілітацыйная экспертная камісія паставіла мне 2-ю групу па псіхіятрыі. Безпадстаўна!», – скардзіцца Таццяна.

Прычыны псіхіятрычнага пераследу

Таццяна Вайтовіч тлумачыць такое стаўленне да сябе асабістай помстай галоўнага лекара Наваградскага шпіталя, з якім жанчына мае зацяжны канфлікт. Акрамя таго, паводле меркавання актывісткі, прычынай пераследу магло стаць яе жаданне вылучыцца на сёлетніх выбарах у мясцовыя саветы.

«Я ўвесь час абараняла правы і законы нашых грамадзянаў. Заўсёды імкнулася, каб грошы, якія паступаюць у бюджэт, даставаліся народу, а не толькі ўладзе. У мяне вялікі стаж у Наваградскай цэнтральнай лякарні і я добра ведаю, што там адбываецца. Я накіроўвала скаргі супраць карупцыі ў адміністрацыю кіраўніка краіны, у выніку чаго прыязджаў дзяржкантроль і выявіў вялізныя крадзяжы грошай, махінацыі ў выплаце заробкаў медыкам», – гаворыць Таццяна Вайтовіч.

Таццяна Вайтовіч паказвае заключэнні Міністэрства здравааховы і медыка-рэабілітацыйнай экспертнай камісіі.Фота – Васіль Малчанаў/Белсат

Аднак спроба высунуць сваю кандыдатуру ў мясцовыя дэпутаты не сталася для Таццяны паспяховай. Яна кажа, што яе падманулі ў Наваградскім райвыканкаме, паведаміўшы непраўдзівую інфармацыю аб месцах збору подпісаў.

«Мы 100 подпісаў сабралі за два дні! Людзі мяне ведаюць. Але юрыст райвыканкаму запэўніваў мяне, што можна збіраць подпісы не толькі ў сваёй акрузе. Пасля гэтага, пры падачы подпісаў мне паведамілі, што гэта не так. Што подпісы маюць быць сабраныя з грамадзянаў выключна сваёй выбарчай акругі», – тлумачыць актывістка.

Цяпер Таццяна Вайтовіч чакае апошняй экспертызы Міністэрства аховы здароўя, якая мае прыйсці ў абласны суд у Горадні, пасля чаго будзе прызначанае другое судовае паседжанне для разгляду яе скаргі.

Паўліна Валіш, belsat.eu

Стужка навінаў