Гэта снег, толькі снег. Re1ikt і Аракелян запісалі песню на чароўны верш Купалы (прэм’ера)

urgent

Уладальнікі тытулу «Героі году-2013» у дуэце з найлепшым саксафаністам Беларусі паклалі на музыку верш Купалы, які сучаснікі паэта назвалі цудам.

Літаратуразнаўца Пятро Васючэнка лічыць верш «Толькі снег» ці не самым прыгожым і музычным у творчасці Янкі Купалы. Паэт напісаў яго на пачатку зімы 1909 году. Ён запрасіў сваю будучую жонку Уладку Станкавічанку ў віленскі тэатр на пʼесу Пшэбышэўскага пад назвай «Снег». У той жа вечар у Вільні пайшоў першы снег. Купала правёў Уладку дадому, пэўна, што зайшоў у кавярню, па дарозе склаў верш і зайшоў у рэдакцыю газеты «Наша Ніва».

Па ўзгадках Вацлава Ластоўскага, паэт завітаў «пад знакам бахуса». Там упершыню і прачытаў верш пра снег. Ластоўскі па праслухоўванні сказаў, што Купала стварыў цуд, так закрануў «Толькі снег» усіх прысутных. На наступны дзень 27-гадовы паэт падараваў свой твор разам з кветкамі Уладцы.

Гэтыя радкі кранулі праз стагоддзе новае пакаленне музыкаў – гурт Re1ikt у дуэце з Паўлам Аракелянам запісалі песню «Толькі снег» для праекту «Новае пакаленне на Новы год».

«Гэта наш першы твор на словы класіка, – распавядае лідар і бубнач Re1ikt Алесь Дземідзенка. – Таму было нязвыкла і цікава. Музыка напісалася вельмі лёгка. І вельмі радыя, што атрымалася супраца з Паўлам Аракелянам, нам заўжды карцела зрабіць хоць бы адзін твор з саксафонам, таму ў гэтай песні ёсць лёгкі джазавы прысмак».

Праца сапраўды прайшла надзвычай лёгка і музыкам было камфортна разам, хоць дагэтуль яны і не былі знаёмыя. Дзякуючы такому душэўнаму ўздыму, кампазіцыя фактычна была даведзеная да ладу за тры гадзіны.

«Музыкі з Re1ikt усё зрабілі самі. Дарэчы, яны – выдатныя дзядзькі, – кажа Павал Аракелян. – Пасля першай і адзінай рэпетыцыі мы цалкам паразумеліся і клёва правялі час. Падчас запісу кампазыцыі мне трэба было толькі сыграць сваю частку, заспяваць разам з вакалістам Вовам Казловым і злёгку паімправізаваць. Усё атрымалася як мае быць!».

Песня «Толькі снег» была запісаная для праекту «Новае пакаленне на Новы год», відэаверсію якога можна паглядзець у ноч з 31 снежня 2015 на 1 студзеня 2016 году на тэлеканале «Белсат».

Залягла, як пасьцель,

Лебядзіная бель

На загон, на курган,

І кажан, і груган

Занямеў не на сьмех:

Гэта сьнег, толькі сьнег

За старухай-зямлёй

Ты пасьцель, дружа мой,

Узваліў на душу,

Як бы крыж на мяжу,

I ўжо рад не на сьмех:

Гэта сьнег, толькі сьнег

Думкі, сэрца, паглёд

Абліў лёд, скаваў лёд.

Так спавіў, спавіў сам,

Каб лягчэй было там,

Дзе жыцьцё не на сьмех:

Гэта сьнег, толькі сьнег

Ты і жыў, і любіў,

Ты ня ўмёр – і забыў,

Каб нічога ня дбаць,

Сьмела ўдаль паглядаць,

Быць самым не на сьмех

Гэта сьнег, толькі сьнег

Хтось сваяк, не сваяк –

Як жыў, скончыўся так.

Прагудзеў поп і звон,

Ідзі з памяці вон:

Бой за хлеб не на сьмех!

Гэта сьнег, толькі сьнег

Моʼ і лёгкія дні…

Не зачэпяць ані

Ні бяда, ні нуда,

Ні агонь, ні вада…

Само шчасьце, сам смех!

Гэта сьнег, толькі сьнег

СБ/ЮВ, belsat.eu

Глядзі таксама
Каментары