Чальцы прапуцінскага мотаклубу перашкаджалі працаваць журналістам «Белсату» нават на вуліцы.
Журналісты Алесь Ляўчук і Мілана Харытонава прыехалі на прэс-канферэнцыю «Начных ваўкоў», але дарогу на ўваходзе ў прадстаўніцтва Расеі ў Берасці ім перагарадзілі чальца мотаклубу: не пускалі нашых калегаў у будынак кансулату і заміналі здымаць перад уваходам.
Байкеры спаслаліся на тое, што нашых калегаў няма ў спісе акрэдытаваных журналістаў, хаця акрэдытацыі на гэтую сустрэчу не было – на яе пускалі ўсіх журналістаў і блогераў.
Пазней адзін з каардынатараў «Начных Ваўкоў» Андрэй Баброўскі прызнаўся, што загад не пускаць журналістаў «Белсату» аддаў асабіста Аляксандр Залдастанаў (мянушка – Хірург), і не выканаць яго ён не можа.
«Два гады таму я нагадаў Хірургу, што на пачатку Другой сусветнай вайны Савецкі Саюз быў саюзнікам фашысцкай Германіі, за што ён мяне назваў правакатарам, – кажа «Белсату» Алесь Ляўчук. – Як толькі Хірург з’явіўся каля консульства, ён адразу паказаў сваім хлопцам на мяне».
Наш калега нагадаў байкеру пра хаўрус Сталіна з Гітлерам пасля таго, як калону «Начных ваўкоў» не пусцілі ў Польшчу ў траўні 2016-га.
СА