Міліцыя забрала бел-чырвона-белыя сцягі і ўсё знятае відэа, з якога мае паўстаць новы кліп гарадзенскага гурта. Падчас здымкаў АМАП затрымаў 15 чалавек.
«Нас зараз вязуць у РУУС Заслаўя. Затрымалі ўсіх музыкаў ды тых, хто дапамагаў нам у працы над кліпам, у тым ліку гісторыка Ігара Мельнікава. Усіх пасадзілі ў аўтазак, у любым момант могуць забраць тэлефон», – паведаміў «Tuzin.fm», вакаліст Dzieciuki Алесь Дзянісаў.
У РУУС музыкам і здымачнай групе паведамілі, што ў аддзяленне іх даставілі для размовы. Падставай для затрымання стала адсутнасць у музыкаў дазваляльных папераў на здымкі.
Па непацверджанай інфармацыі ў міліцыю патэлефанавалі мясцовыя жыхары Заслаўя, якія спужаліся людзей у вайсковай форме. Музыкі былі апранутыя ў вайсковыя строі часоў грамадзянскай вайны. На здымачнай пляцоўцы былі і бел-чырвона-белыя сцягі, якія выкарыстоўвалі ў якасці рэквізіту.
Новы кліп гарадзенцаў здымаецца на песню «Хлопцы-балахоўцы» і прысвечаны чарговай гадавіне Слуцкага збройнага чыну (спроба ўзброенай абароны незалежнасці Беларусі ў раёне Слуцку ў лістападзе і снежні 1920 г.).
Усё знятае відэа міліцыя забрала на экспертызу, якая будзе доўжыцца прыкладна 10 дзён.
ЮВ, belsat.eu