Эдуард Пальчыс аб’явіў грамадзянскую кампанію назірання за вучэннямі «Захад-2017»

video

Блогер і стваральнік праекту 1863x.com прапаноўвае далучацца да грамадзянскай кампаніі па назіранню за вучэннямі «Захад-2017». Пра гэта Эдуард Пальчыс абвесціў у Facebook’у.

«Вакол вучэнняў вельмі шмат самых розных меркаванняў, якія часта супярэчаць адно адному. Без фактаў, халоднага аналізу і канкрэтыкі напружанасць будзе нарастаць не толькі ў Беларусі, але і ва ўсім рэгіёне. Для гэтага як раз і прапаную выкарыстоўваць усім OSINT-метад», – распавядае belsat.eu Эдуард Пальчыс.

Метад OSINT – разведвальная дысцыпліна, якая даступная амаль кожнаму карыстальніку інтэрнэту. Яна грунтуецца на аналізе інфармацыі з адкрытых крыніц.

«Неабыякавыя жыхары Беларусі, якія пражываюць у раёне вучэнняў, могуць усё фіксаваць на фота, відэа і запісваць у тэкставым варыянце. А пазней выкладаць у сеціва пад гэштэгам, ці адпраўляць СМІ. Дадзеная інфармацыя будзе публікавацца ў агульны доступ, што дасць магчымасць спецыялістам цвяроза аналізаваць тое, што адбываецца», – працягвае Пальчыс.

Блогер прапануе выкарыстоўваць гэштэгі #Запад2017, #Захад2017 і #Zapad2017.

Сёлета вучэнні пройдуць з 14 па 20 верасня на 6 палігонах: «Лепельскі», «Барысаўскі», «Лосвіда» (Віцебская вобласць), «Асіповіцкі», палігонах ВПС і войскаў СПА «Ружанскі» і «Даманаўская» (Берасцейская вобласць), а таксама на адным участку мясцовасці паблізу населенага пункта Дрэтунь (30 км ад Полацка). Запрошаныя на іх і міжнародныя назіральнікі.

ДР belsat.eu

Глядзі таксама
Каментары