Дырэктар светлагорскага цэлюлознага камбінату: «У краіне не стае макулатуры»


А працаўніца гэтага камбінату мяркуе, што не стае грошай на аплату электраэнергіі і менавіта праз гэта прадпрыемства перайшло на чатырохдзёнку.

Працаўнікі светлагорскага цэлюлознага камбінату скардзяцца на скарачэнне працоўных дзён. У траўні працоўнаму калектыву паабяцалі канікулы да 11-га.

Ходзяць чуткі, што мы не працуем, бо прадпрыемства не можа заплаціць рахункаў за электраэнергію. На абурэнні працаўнікоў адказ адзін – вас ніхто не трымае. Каму ёсць куды сысці, ужо гэта зрабілі, – распавяла tut.by працаўніца аднаго з цэхаў. Жанчына паскардзілася, што ейны заробак і так невялікі ды складае крыху больш за Br 3 млн, што ж тады ад яго застанецца ў траўні?

Паводле генеральнага дырэктара камбінату Юрыя Крука, прадпрыемства сапраўды афіцыйна абвесціла аб пераходзе на чатырохдзёнку, але пра запазычанасць за электрычнасць гаворкі не ідзе.

У краіне не стае макулатуры. З гэтай прычыны пакутуем не толькі мы, але і ўсе прадпрыемствы канцэрну. Рыхтуюцца змены ўказу прэзідэнта. Думаю, пасля гэтага з другаснай сыравінай сітуацыя ў краіне мусіць палепшыцца, – мяркуе дырэктар.

У 2012 годзе ААТ «Светлагорскі цэлюлозна-кардонны камбінат» і ААТ «Кітайская карпарацыя інжынірынгу САМСЕ» распачалі рэалізацыю супольнага праекту для ўзвядзення заводу сульфатнай беленай цэлюлозы. Увосень стане вядома, калі стартуюць комплексныя выпрабаванні новага заводу.

ЮВ, belsat.eu, паводле tut.by

Глядзі таксама
Каментары