Станіслава Канавалава і Дзмітрыя Паліенкі могуць судзіць за хуліганства.
Паводле Праваабарончага цэнтру «Вясна», у менскай гарадской міліцыі на двух удзельнікаў роварнай акцыі «Крытычная маса», якая праходзіла ў Менску 29 красавіка і была спыненая міліцыяй, заведзеныя крымінальныя справы паводле 2 часткі 339 артыкулу Крымінальнага кодэксу. Гэта артыкул пра аказанне супраціву супрацоўніку міліцыі, які спыняе хуліганства.
Раніцай 2 траўня ў менскай гарадской міліцыі інфармацыю пра завядзенне крымінальных спраў на Станіслава Канавалава і Дзьмітрыя Паліенку не пацвердзілі, але і не абверглі, падае «Радыё Свабода».
«Звесткі ёсць, але іх трэба яшчэ ўзгадніць», – сказаў кіраўнік прэсавай службы ГУУС Менску Аляксандар Ластоўскі.
Увечары 29 красавіка ў Менску міліцыя схапіла больш 10 раварыстаў «Крытычнай масы», якія сабраліся, каб заявіць пра свае правы. АМАПаўцы закінулі маладых людзей у аўтобус тварам у падлогу, збівалі ў жываты і па тварах. Большасць затрыманых адпусцілі, але Станіслава Канавалава і Дзмітрыя Паліенку пакінулі ў пастарунку.
30 красавіка ў кватэры раварыста Станіслава Канавалава адбыўся ператрус, у яго забралі цвёрды дыск кампутара. Тады ж стала вядома пра пагрозу завядзення на раварыста крымінальнай справы за хуліганства.
ДР, belsat.eu